“Дизайн” кулги жамоаси аъзоси Элмурод Ҳақназаров бешинчи яккахон концерт дастурини намойиш этди. Жайдари ва самимий ҳазиллари билан мухлислар кўнглини забт этган ижодкорнинг концерт дастурида “Дарё” мухбирлари ҳам меҳмон бўлишди. Саҳна ва унинг ортидаги қизиқарли жараёнларни кузатиб, кўплаб ижодкорлар билан суҳбатда бўлишди.

Элмурод Ҳақназовни қўллаб-қувватлаш учун кўплаб ҳамкасблари ташриф буюришди. Шукрулло Исроилов саҳнага чиқишидан аввал ёш ижодкорга оқ фотиҳа берди.

Концерт дастурига “Дизайн” жамоаси аъзолари Саъдулла Фатҳуллаев ва Абдураҳмон Мавлоновлар бошловчилик қилишди. Дилшод Мусабеков эса режиссёрлик қилди.

Одатда, қизиқчиларнинг концерт дастурида қўшиқларга у қадар алоҳида эътибор берилмайди. Элмурод Ҳақназов эса бу йилги концерти тўлиқ жонли ижрода бўлишини истади. 

Эрик Ҳайдарнинг бу йилги чиқиши ҳам томошабинлар томонидан илиқ қарши олинди. 

Элмурод Ҳақназовнинг концертига рақобатчи жамоа вакиллари ҳам ташриф буюриб унга омад тилашди.

— Тўрт соатдан кейин хорижга кетишим керак. Шунга қарамай концертни томоша қилгани келдик. “Миллион”, “Браво”, “Дизайн” жамоаси ижодда бир-бирига рақобатчи бўлиши мумкин. Аммо ҳаётда улар бир-бири билан дўст. Менимча, иш билан ҳаётни бир-бирига аралаштириб юбориш ақлдан эмас, — дейди Даврон Кобулов.

— Элмурод Ҳақназоров кам ухлайдиган ижодкорлар тоифасига киради. Тинимсиз изланишда бўлиши саҳнадаги чиқишларида ҳам яққол сезилади. Кейин биласизми, ичи йиғлаб туриб, одамларни кулдириш жуда қийин. Ҳозир укам синовли кунларни бошдан кечирмоқда, аммо буни мухлисларига сездираётгани йўқ. Унга фақат омад тилайман. Ўтган йили бир кун, бу йил икки кун. Бу кунлар сони йил сайин ошиб боришига ишонаман, — дейди Дилшод Мусабеков. 

Дастурда Гулсанам Мамазоитова ва Достон Эргашевлар қўшиқ ижро этиб, мухлислар кайфиятини янада кўтаришди. Элмурод Ҳақназаров ҳам қўшиқчиликдан хабари бўлгани учун ёш ижодкор билан дуэт ижро этди.

Агар концертнинг саҳна ва унинг орти жараёнлари қандай кечганлигига қизиқсангиз видеони тўлиқ ҳолда томоша қилинг.