Даврон Кабулов ўзбек шоу-бизнесида нафақат шоумен, балки ишнинг кўзини биладиган тадбиркор сифатида ҳам танилган. “Миллион” ва “Космос” жамоаларининг раҳбари бўлган Даврон Кабулов тадбиркорликда ҳам талайгина ютуқларга эришган. Хўш, унинг омад сири нимада, умуман, ўзбек шоу-бизнесига кириб келиш жараёнлари қандай кечган. Келинг, ҳаммаси ҳақида батафсил маълумот берамиз.
“Бозорда олча сотардик”
Даврон Кабулов Тошкент шаҳрида, ишчилар оиласида дунёга келган. Бувисининг эрта ўлими сабаб уни бобосининг тарбиясига беришган. Бобога эрмак бўлган набира болаликдан меҳнатга ўрганган.
— Ён қўшнимиз бошқа миллат вакили эди. У элчихонада ишлагани учун томорқасига эътибор беролмасди. Бобом раҳматли ўзимизникига қўшиб қўшнимизнинг боғига ҳам олча дарахтини экканди. Ҳар йили 13 туп олча дарахтининг меваларини териб, бозорга олиб бориб сотардик. Бобом “Шарқ юлдузи” журналини ўқишни яхши кўрарди. Токчаларидан газета, китоб ва журналлар аримасди. Барча болалар сингари мен ҳам шўх ва ўйинқароқ бўлганман. Баҳоларим фақат аъло бўлмаса ҳам, устозларим билан тез тил топишиб кетардим. Чунки тенгдошларимга нисбатан фикрларим анча теран бўлган. Албатта, бунда бобомнинг ҳиссаси катта бўлган, — дейди Даврон Кабулов.
“Касаллик сабаб футболдан кетганман”
Даврон Кабулов болаликдан футболчи бўлишни орзу қилган. Афсуски, касаллик сабаб шифокор унга футбол ўйнашни ман қилган.
— Болалигимдан санъаткор бўламан, деб ният қилмаганман. Аммо эсимни таниганимдан буён футболчи бўлишни орзу қилардим. Афсуски, 14 ёшимда кўкйўтал касаллигига чалинганман. Шифокорлар бир йилга қадар футбол ўйнашни ва югуришни тақиқлаб қўйишган. Афсуски, чеклов давридан сўнг футболни ўйнашга бўлган иштиёқим анча сустлашган. Аммо бу спорт шарҳловчиси бўлишимга катта ҳисса қўшган, — дейди Даврон Кабулов.
“Дадам катта қарзга ботган”
Кўпчилик Даврон Кабуловни бадавлат инсон деб билади. Аммо унинг оиласи ҳам қийин молиявий кунларни бошидан ўтказган.
— 1994 йил оиламиз учун жуда оғир кечган. Бувим вафот этган. Орадан кўп ўтмай уйимизда ёнғин чиқиб, бор-будимиз аланга ичида қолган. Ўша кунга қадар дадам тадбиркорлик билан шуғулланар эди. Бирдан ишлари орқага кетиб, 140 минг АҚШ доллари миқдорда қарзга ботган. Ўша пайтда пойтахт маркази бўлган “Ойбек” метроси томондан 2-3 минг АҚШ долларига уй олса бўладиган пайтлар эди. Энди қарзнинг қанчалик катта эканлигини тасаввур қилаверинг. Қарзни тўлаш керак, деб ўзимни кўп нарсалардан чеклардим, — дейди Даврон Кабулов.
“Пул тўлаб ўқимайман, деганман”
Даврон Кабулов билан суҳбатлашган инсон унинг илмли инсон эканлигини дарҳол пайқайди. Бошқа ҳамкасбларидан фарқли равишда, у китоб ўқишни яхши кўради. Институтга ҳам грант асосида ўқишга қабул қилинган.
— Ўзбекистон Миллий университетининг журналистика факультетида таҳсил олганман. Ўқишга кириш учун жиддий тайёргарлик кўрганман. Оиламнинг моддий аҳволини билганим учун “Агар контракт асосида ўқишга кирсам, ўқимайман”, деб ўз-ўзимга ваъда бергандим. Шунинг учун имтиҳонга жиддий тайёргарлик кўрганман. Тарихдан 36 та, она тили ва адабиёт фанидан эса 33 та тестни тўғри топганман. Инглиз тилидан анча суст эдим, 18 тагина тўғри жавоб топганман. У пайтдаги университетларга кириш баллари анча юқори эди. “Оиламни қийин вазиятдан олиб чиқаман”, деган қатъий қарорим сабаб энг юқори баллни олиб, талаба бўлганман, — дейди Даврон Кабулов.
“Мен Элдор Мустафоевдан яхшироқ шарҳлайман”
Даврон Кабулов тасодифан спорт шарҳловчиси бўлгани ҳақида ҳам сўзлаб берди.
— Аълочи талаба бўлмаганман, аммо ўз фикримни айтишни, баҳслашишни яхши кўрардим. 86 та талаба ўтирадиган аудиторияда орқадаги ўриндиққа ўтириб, қўшимчасига икки оёғимнинг тагига ҳам алоҳида стуллар қўйиб қўярдим. Бир куни устозимиз спорт журналистикаси ҳақида мавзу ўтаётганда шарҳловчи Элдор Мустафоев ҳақида гап очган. Тасодифан “Мен футболни ундан яхшироқ шарҳлайман”, деб юборганман. “Қани ўрнингдан турчи, ҳақиқатан футболни яхши шарҳлайсанми?” деган. Ишонч билан ҳа деганимдан кейин икки кундан кейин телевидениега келишимни тайинлаган. Кейин билсам, у устоз университетдан ташқари, Ўзбекистон Миллий телерадиокомпаниясида ҳам ишлар экан. Фарҳод Рўзиев директорнинг 1-ўринбосари бўлиб ишларкан, тезда ёнига спорт бўлими муҳаррирларини чақириб, “Бу болага бир текст ўқитиб кўринглар”, деган. Болаликдан спортни кузатганим учун улар бераётган саволлар умуман қийинчилик туғдирмаган, — дейди Даврон Кабулов.
“Ишга киролмайсан, дейишганди”
Даврон Кабулов ҳаётида ҳам ҳаммаси осон кечмаган. У радиога ишга олинмаган кунларини кулиб эслайди.
— Университетда ўқиётган пайтимда радиобошловчиликка қизиқиб қолганман. “Пойтахт” радиосига ишга олишмаган. “Овозинг яхши-ку, аммо талаффузинг хато дейишган. Ҳатто қўшимчасига “Бу камчилик билан сени ҳеч қаерга ишга олишмайди”, деб юпатиб ҳам қўйишган. Спорт хабарлари редакциясига ишга кирганимдан кейин дикторлар ўқиган қоғозларни уйга олиб келиб, ҳар куни кечқурун матнларни ўқишни машқ қилардим, — дейди Даврон Кабулов.
“Эфирдан четлатиб, жазолашган”
Даврон Кабулов аввалдан чўрткесар бўлгани, жонли эфирда ўйламай гапириб юборганлари учун эфирдан четлатилгани ҳақида гапириб берди.
— Футболни бор-йўғи 3 марта шарҳлаш бахтига мушарраф бўлганман. Охирги жонли эфирда қовун туширганимдан кейин мени 3 ойга эфирдан четлатишган. 2006 йилдан то 2012 йилга қадар телевидениеда ишладим. “Миллион” жамоаси ташкил этилганидан кейин бор эътиборимни унга қаратишга қарор қилганман. Чунки телевидениедаги “айтиш мумкин эмас” гапларни айтмаслигимга жавоб беролмасдим, — дейди Даврон Кабулов.
“Аёлимни 614 та қиз ичидан танлаб олганман”
Даврон Кабулов турмуш қуришидан олдин 614 та қизнинг номзодини кўриб чиққан. У “Муҳаббат қиссалари” кўрсатувига берган интервьюсида турмуш ўртоғи унинг мухлиси бўлгани ҳақида гапирган.
— “Афрўз” гуруҳининг аъзоси Жамшиднинг тўйида битта қиз дугоналари билан расмга тушсак бўладими, деб олдимга келган. Бизни расмга олаётган қизга “Сен ҳам тушиб ол”, деган. Мухлисим бўлганини тўйдан тўрт ой ўтиб айтган. Мен сезмаганман буни, чунки учрашган пайтларимизда ҳам мени танишига ишонмаганман. Аёлимни 614 та қиз ичидан танлаб олганман, — дейди Даврон Кабулов.
Тўйлардаги гонорари қанча?
Даврон Кабуловнинг тўйлардаги гонорар суммаси 600 АҚШ долларини ташкил қилади. Кўпчилик “Миллион” жамоасини тўйларга таклиф қилади. Аммо Даврон Кабулов жамоанинг тўйларда иштирок этишини унчалик ёқтирмайди. Бундан ташқари, жамоанинг бошқа санъаткорларнинг концерт дастурида иштирок этиши ҳам жумбоқли масала. Миш-мишларга қараганда, “Браво” жамоаси аъзоларининг ажралиб чиқишига ҳам шу масала сабаб бўлган. Яъни тўрт аъзо Даврон Кабуловни огоҳлантирмай, бир хонанданинг концерт дастурида саҳнага чиқишган. Бундан Даврон Кабулов ранжиган ва уларни “Миллион”дан четлаштирган.
Тадбиркорликка қандай улгуради?
Даврон Кабулов санъатдан ташқари, тадбиркорлик билан ҳам шуғулланади. У суҳбат давомида нега эркаклар кийим дўконини ёпгани ва янги очилган хусусий меҳмонхонаси ҳақида ҳам айтиб ўтди.
— Ишлаб чиқаришни тўхтатганимиз йўқ, шунчаки ҳозирча эркаклар кийим дўкони ишламаяпти, холос. Бунинг асосий сабаби ишни юрита оладиган яхши менежерга ёлчимадик. Ўзим жисмонан ҳамма ишга улгурмайман. Битта менежернинг қўли “тормоз”, бошқаси эса ишни умуман юритолмади. Хуллас, ўзимизни ҳам, брендни ҳам қийнагандан кўра, ишни вақтинча тўхтатиб туришга қарор қилдик. Маҳсулотлар ишлаб чиқариляпти ва асосан онлайн савдо орқали мижозларга етказиб бериляпти. Узоқ йиллар давомида жаҳон талабларига жавоб берадиган хусусий меҳмонхона қурдим. Даромадимни унга сарфлаганим учун ҳам у узоқ вақт давомида қурилди. Ҳозирча бизнесдаги бор эътиборимни унга қаратяпман, — дейди Даврон Кабулов.
“Меҳмонхона иши бўйича судлашув”
Даврон Кабулов меҳмонхона бизнеси тўлиқ ишга тушмай муаммоларга учрагани ҳақида “Дарё”га берган интервьюсида айтиб ўтган.
— Ўтган йили август ойида шахсий меҳмонхонамиз ишга тушди. Икки ярим ой ишлагандан кейин Яккасарой газ таъминоти Прокуратура ҳузуридаги иқтисодий жиноятларга қарши курашиш департаменти билан бирга келиб, меҳмонхонани нишонга олишди. Икки йиллик давр учун 387 миллион сўм жарима қўллашди. Ундан кейин ҳам олти ойга яқин вақт ўтди, аммо ҳали меҳмонхона бунча даромад топгани йўқ. Менимча, улар тадбиркорларни шу тарзда “қўллаб-қувватлашяпти”.
Дадам меҳмонхонага газ таъминоти улангандан кейин АҚШга кетдилар. Аммо у пайтда ҳали меҳмонхона ишга тушмаган эди. Яъни АҚШга кетмасдан аввал сертификат олиш, GOST стандартидан ўтказиш каби ишларни амалга ошириб, меҳмонхона ишга тушгандан кейин туман газ таъминоти билан шартнома тузиб, газни улаш керак бўлган. Аммо у жараёнда дадам Тошкентга бўлмаганлар. Унгача бўлган даврда меҳмонхона ишламаганини ҳамма билади. Газ таъминоти эса уларга ариза топширган вақтимиздан то бугунги кунгача бўлган даврда қувурдан қанча газ ўтиши мумкин бўлса, ўшанча маблағни ҳисоблаб беришди. Бу худди қишда ҳам ёзда ҳам кунига 24 соат тинимсиз газдан фойдаланилган, дегандек гап.
Эшитишим бўйича, уларнинг шундай бизнеси бор экан. Яъни бир-икки сўмини олиб, газни чиқариб беришар эканда, кейин тадбиркорлардан пулини ундириб олишар экан. Ҳозир шу иш бўйича суд жараёнлари кетяпти, — дейди Даврон Кабулов.
Даврон Кабулов яхши ижодкор бўлиш билан бирга, меҳрибон ота бўлишга ҳам интилади. У икки қиз ва бир ўғилнинг отаси. Ишдан бўш вақтларида фарзандларига вақт ажратиши ва улар билан ўйингоҳларга боргани ҳақидаги видеоларни Instagram тармоғига жойлайди.
Изоҳ (0)