Қизиқчи Жамшид Норматов YouTube’даги “Daryo Lifestyle” каналига берган интервьюсида ота-онасидан кетма-кет айрилгани, биринчи турмуш ўртоғининг вафоти ва “Браво” билан бўлган келишув нима учун узоқ давом этмагани ҳақидаги саволларга жавоб берди.
— Ота-онам машҳурликка эришишимни, мукофотлар қўлга киритишимни узоқ йил кутишди. 2019 йил концерт берганимда ҳам онам ишонқирамай, орқа қаторда ўтирганди. “Сен бир китоб ўқимаган бола бўлсанг, қандай қилиб концерт берасан, одамлар устингдан кулишмасин”, деганди. Афсуски, ота-она омонат экан, ғафлатда қолиб улардан айрилиб қоларканмиз. Карантин сабаб узоқ вақт ота-онамни кўргани боролмай қолдим. Бир куни отам қўнғироқ қилиб “Ўғлим сени кўргим келяпти-да”, деди. У пайтлари пандемия назорати кучайган, шаҳардан чиқишнинг ўзи амримаҳол эди. “Бўлди бораман, ота” десам “Йўқ, касаллик роса кўпайибди, эҳтиётингни қилиб уйда ўтир” деди. Ўша куни бормаганимдан ва отамнинг сўнгги сўзларини эшитолмаганимдан афсусланаман. Чунки уч кундан кейин отамнинг жони узилгани ҳақида хабар беришди. Тошкентдан Бешариққа қандай етиб борганимни билмай қолдим.
Кейин билсам, 64 ёшга кирган отам мени кутиб-кутиб вафот этган экан. Ўзбекистонда бўла туриб ўша пайт ёнида бўлмаганим учун ўзимни кўп койидим. Майли онам ҳаёт-ку, энди унга етарлича эътибор бераман деб ният қилгандим. 23 май куни онам Telegram’дан она ва бола суҳбати ҳақидаги таъсирли видео юборди. Овозли хабар жўнатиб, ҳол-аҳвол сўрадим, аммо тушгача жавоб келмади. Кейин акам қўнғироқ қилиб “Тезда етиб кел, онамдан ҳам айрилдик”, деди. Жоним бўғзимга келди, “Нима қиляпсизлар, нега 40 кунда кетма-кет ҳам отамдан, ҳам онамдан айрилдик”, дедим. Ўзи оилада иккитагина ўғилмиз. Иш, хизмат, рўзғор деб ота-онамнинг ёнида бўлмаганимдан кўп афсусланаман, дейди Жамшид Норматов.
Жамшид Норматов бир муддат “Браво” кулги жамоасига қабул қилиниши ва унда узоқ фаолият юритолмаганининг сабаблари ҳақида гапирди
— “Браво” Миллион” жамоасидан алоҳида ижод қилишни бошлаганидан кейин Отабек Мирзахолов “Ака, концертимизда чиқсангиз-чи, сизбоп саҳна кўриниши бор”, деди. Шевалар билан боғлиқ саҳна кўринишини ёзиб борсам, ҳамма мириқиб кулди. Чиқишимиз мухлисларга ҳам манзур бўлди. Жамоада қолиб ижод қилишим мумкин эди, аммо мен у ерда ўзимни тополмадим.
Илгари кичик давраларда қизиқчилик қилардим. Аммо концерт бериш ҳақида ўйламасдим. Кейин бир таниш акамиз “Кичик давраларда юраверасизми, қачон концерт берасиз?” деб қолди. Концерт бериш учун ҳомий бўлиши кераклиги ҳақида айтганимда, “Ёрдам берамиз”, дейишди. Ўша инсонларнинг турткиси сабаб 18 йил деганда катта саҳна “Туркистон” санъат саройида концерт бердим, дейди Жамшид Норматов.
Қизиқчи биринчи турмуш ўртоғи вафот этгани, унинг сўнгги дақиқагача даволатишга ҳаракат қилгани ҳақида гапирди.
— Бу ҳақда ҳеч бир интервьюда гапирмаганман. Биринчи аёлим ниҳоятда яхши инсон эди. Аммо уйланганимдан кейин жигари оғриганлигини билиб қолдим. Турмушимиз давомида фарзандли бўлмадик, аммо сўнгги нафасигача уни даволатишга ҳаракат қилдим. У энг қийин вазиятларимда ёнимда бўлди, ижарама-ижара кўчиб юрардик. Афсуски, умри қисқа экан, оламдан ўтди. Иккинчи аёлим билан танишдим, тўй куни белгилангандан кейин анча вақтгача ўтмишим ҳақида айтмадим. Билиб қолгандан кейин “Нега гапирмадингиз?” деб ранжигандек бўлди. Ҳозирги аёлим билан икки ўғил ва бир қизим бор. Кўз тегмасин, ҳозир ҳаётимиз анча яхши, бугунги турмуш аввалги қийинчиликларнинг мукофоти дейман, дейди Жамшид Норматов.
Видеони тўлиқ ҳолда томоша қилишингизни тавсия қиламиз.
Изоҳ (0)