Иқтисодиёт ва молия вазирлиги Тошкент шаҳридаги “Қўйлиқ” ва “Чорсу” бозорларидаги асосий қишлоқ хўжалиги маҳсулотлари улгуржи нархларини эълон қилишни тўхтатди. Бунга сабаб сифатида “Қўйлиқ” бозори реконструкцияга олингани келтирилган. Кунлик нархлар бир муддат танаффусдан сўнг 2023 йилнинг октябрь ойидан бери ўрганилаётганди.
Тошкент шаҳар ҳокимлиги реконструкция даврида “Қўйлиқ”да иш олиб бораётган савдогарларга янги қурилган Food City бозори ёки Tashkent Index’га кўчишни тавсия қилган.
“Бунда тадбиркорлар мулкларини кўчириш билан боғлиқ бўлган харажатлар (транспорт, юклаш, тушириш ва бошқалар) бепул амалга оширилади ҳамда савдо мажмуаларидаги дўконлар учун ижара тўловларидан 3 ой муддатга озод қилинади. Бозорда фаолият юритаётган 144 нафар ишчи-ходимлар Food City ва Tashkent Index савдо мажмуаларида иш билан таъминланади”, — дейилади ҳокимлик хабарида.
Иқтисодчи Отабек Бакиров Telegram каналида кунлик нархлар эълонини тўхтатиш нотўғри эканини ёзиб, эндиликда Food City’даги маҳсулотлар нархларини маълум қилиб бориш мақсадга мувофиқ бўлишини билдирди.
“Қўйлиқ” бозори ихтиёрий-мажбурий реконструкцияга олингач, улгуржи харидорлар ва истеъмолчилар учун жуда муҳим “ориентир” йўқ бўлиб қолди. Ҳудудлардан гўшт, мева-сабзавот келтирувчи ва Тошкентда улгуржи харид қилувчи тадбиркорларда доимий учрашув ва битим жойи бузилди, коммуникацияларга путур етди. Истеъмолчилар янгидан нисбий афзал бозорларни қидиришни бошлади. Масалан, пабликларда ўша мақталган Food City’даги нархлар “ТТЗ” бозоридаги нархлар билан бир хил экани, шу кунларда энг арзон бозор “Фарҳод” бозори бўлиб қолганини ёзишмоқда. Демак, бизнесга ҳам, истеъмолчиларга ҳам нарх ишоралари керак. Нима учун Иқтисодиёт ва молия вазирлиги ўша Food City’даги нархларнинг минимал ва максимал кўрсаткичларини эълон қилиб боришни ташкил этиши мумкин эмас? Ё нархлар “Қўйлиқ”дагидан анча-мунча қиммат бўлиб кетгани учунми? Унда истеъмолчилар ўзи учун қайтадан кашф этаётган янги “ориентир” — “Фарҳод” бозоридаги нархлар эълон қилиб борилсин. Қийин эмас-ку, — дея фикр билдирган иқтисодчи.
Эслатиб ўтмиз, пойтахт ҳокимлиги 2021 йил декабрда “Қўйлиқ” бозори кўчирилиши ҳақида хабар берган эди. Бунда йўл инфратузилмасини яхшилаш, коммуникация тармоқларини такомиллаштириш ва тирбандликларнинг олдини олиш мақсад қилингани таъкидланган. Мазкур эълондан сўнг бозор бузилишидан норози одамлар кўчага чиққан, турли низолар юз берганди. Кейин бозор “Қўйлиқ”дан 6,5 километр узоқликда жойлашган Food City савдо мажмуасига кўчирилиши ҳақида хабарлар тарқалди.
2022 йил июнда собиқ шаҳар ҳокими Жаҳонгир Ортиқхўжаев бозор ҳудуди йўл ўтказгич қурилиши сабаб давлат эҳтиёжлари учун олиб қўйилишига рухсат берган қарор қабул қилган. Муҳокамалар авж олгач, ҳокимлик “Қўйлиқ” деҳқон бозорининг тўлиқ ҳудуди давлат ва жамият эҳтиёжлари учун олиб қўйилиши кўзда тутилмаганини маълум қилган.
“Асосий кириш жойи олдидаги автотураргоҳ ҳудудининг бир қисми ва бир нечта вақтинча савдо қурилмаларининг ўрни қурилиш жараёнига жалб этилади. Бунда, асосий бино ва савдо расталарининг аксарияти ўз жойида қолади. Лойиҳага кўра, жалб этиладиган ҳудуднинг умумий майдони 10 минг кв.метр атрофида бўлади”,––дея ҳолатни изоҳлаган ҳокимлик.
Изоҳ (0)