Ўзбекистон энерготизимидаги техник носозликлар ортидан бозорларда қишлоқ хўжалиги маҳсулотларининг нархи кескин ошиб кетиши мумкин эмас. Буни қишлоқ хўжалиги вазири ўринбосари Шуҳрат Мирзаев Халқаро пресс клубнинг навбатдаги сессиясида маълум қилди, деб хабар беради «Gazeta.uz».
«Қишлоқ хўжалиги маҳсулотлари етарли даражада етиштирилган. Ўзимизда [ишлаб чиқарилгани — tahr.] талабни қопламайдиганлари — картошка ёки гўшт маҳсулотлари ҳам октябрь, ноябрь, декабрь ойларида етарли миқдорда омборхона, музлаткичларга олиб келиниб, захира қилиб қўйилган. Буларни ҳаммаси бозорларда нарх барқарорлигини сақлаб, асоссиз нархлар ошишига олиб келмайди», — дейди Мирзаев.
Қолаверса, бугунги кунда мамлакатда жами 4500 дан ортиқ музлаткичлар борлиги қайд этилган. «Энг асосийси ҳозирги музлатгичлар замонавий типда қурилган, яъни, уларнинг ҳаммаси лойиҳада дизель генератори кўзда тутиб қурилган. Кечаги ҳолатда ҳам бир кунда дизель генератори орқали ишлади», — дейди вазир ўринбосари.
Бундан ташқари, республикада 5 минг гектардан ортиқ майдонда 3,4 мингдан ортиқ иссиқхона мавжудлиги айтилди.
«Газдан келган мутахассисларимиз ҳам айтяптики, бугун, эрта муқобил энергиядан фойдаланиб туришса, уёғига газ таъминоти билан амалга оширилаверади», — дея таъкидлайди Шуҳрат Мирзаев.
Аввалроқ Тошкент шаҳри аҳолисининг асосий қисмини ичимлик суви билан таъминловчи «Қодирия» бош сув иншоотида юқори кучланишли электр таъминотида носозлик сабабли насос агрегатларида ўчиш ҳолати юзага келган эди. Шу туфайли Тошкент шаҳрининг қатор ҳудудларида ичимлик сув таъминоти билан боғлиқ узилишлар кузатилмоқда. Уй-жой коммунал хизмат кўрсатиш вазири ўринбосари Қурбон Турсунов 26 январь куни соат 18:00 га қадар республика бўйича иссиқ ва совуқ сув таъминоти тўлиқ тикланишини маълум қилганди.
Изоҳ (0)