Макроиқтисодий ва ҳудудий тадқиқотлар институти мутахассислари томонидан 2025 йилнинг февраль ойида Тошкент шаҳрида уй-жойлар учун таклиф этилган ижара нархлари таҳлил қилинди.
Пойтахтда ўртача таъмирланган хонадонлар ижара нархлари 2024 йилнинг ноябрь ойидан бери арзонлаб келаётган бўлса, тўлиқ таъмирланган 3 ва 4 хонали хонадонлар учун ўртача ижара нархларида кўтарилиш кузатилди.
Ўртача таъмирланган уй-жойлар ижараси
2025 йилнинг февраль ойида ўртача таъмирланган хонадонлар учун ижара нархлари ўтган йилнинг октябрь ойидан бери сезиларли арзонлади:
- 1 хонали: 323 доллар (ўтган йилнинг октябрь ойига (331 доллар) нисбатан -2.4 фоиз);
- 2 хонали: 393 доллар (ўтган йилнинг октябрь ойига (414 доллар) нисбатан -5.2 фоиз);
- 3 хонали: 480 доллар (ўтган йилнинг октябрь ойига (494 доллар) нисбатан -2.9 фоиз);
- 4 хонали: 545 доллар (ўтган йилнинг октябрь ойига (623 доллар) нисбатан -12.5 фоиз).
Ўртача таъмирланган хонадонлар учун таклиф этилган нисбатан арзон ижара нархлари:
- Сергели тумани (1 хонали - 297 доллар, 2 хонали – 366 доллар, 3 хонали – 415 доллар, 4 хонали - 423 доллар);
- Олмазор тумани (1 хонали – 288 доллар, 2 хонали – 351 доллар, 3 хонали – 417 доллар, 4 хонали – 488 доллар).
Нисбатан қиммат ижара нархлари:
- Шайхонтоҳур тумани (1 хонали – 347 доллар, 2 хонали – 462 доллар, 3 хонали – 568 доллар, 4 хонали – 694 доллар);
- Яккасарой тумани (1 хонали – 383 доллар, 2 хонали – 511 доллар, 3 хонали – 646 доллар, 4 хонали – 675 доллар).
Тўлиқ таъмирланган уй-жойлар ижараси
Мазкур даврда тўлиқ таъмирланган хонадонлар учун ижара нархлари ўтган йилнинг октябрь ойига нисбатан қуйидагича ўзгарди:
- 1 хонали: 420 доллар (ўтган йилнинг октябрь ойига (422 доллар) нисбатан -0.6 фоиз);
- 2 хонали: 592 доллар (ўтган йилнинг октябрь ойига (600 доллар) нисбатан -1.1 фоиз);
- 3 хонали: 857 доллар (ўтган йилнинг октябрь ойига (834 доллар) нисбатан +2.8 фоиз);
- 4 хонали: 1160 доллар (ўтган йилнинг октябрь ойига (1118 доллар) нисбатан +3.8 фоиз).
Тўлиқ таъмирланган уй-жойлар учун таклиф этилган нисбатан арзон ижара нархлари:
- Сергели тумани (1 хонали – 323 доллар, 2 хонали – 417 доллар, 3 хонали – 517 доллар, 4 хонали – 639 доллар);
- Учтепа тумани (1 хонали – 377 доллар, 2 хонали – 436 доллар, 3 хонали – 560 доллар, 4 хонали – 586 доллар).
Нисбатан қиммат ижара нархлари:
- Миробод тумани (1 хонали – 485 доллар, 2 хонали – 746 доллар, 3 хонали – 1051 доллар, 4 хонали – 1344 доллар);
- Шайхонтоҳур тумани (1 хонали – 515 доллар, 2 хонали – 748 доллар, 3 хонали – 1094 доллар, 4 хонали – 1462 доллар).
Ўзбекистонда уй-жой бозори
Аввалроқ Макроиқтисодий ва ҳудудий тадқиқотлар институти мутахассислари республикада уй-жой ва ипотека бозоридаги фаоллик даражасини таҳлил қилганди. Унга кўра, 2024 йилнинг III чорагида Ўзбекистон уй-жой бозорида фаоллик даражаси пасайди. Хусусан, июль сентябрь ойларида кўп қаватли уйлардаги квартиралар олди-сотдиси учун 41 861 та шартнома расмийлаштирилган. Ушбу кўрсаткич 2023 йилнинг мос давридагига нисбатан 3362 тага (7,4 фоизга) кам.
Иқтисодий тадқиқотлар ва ислоҳотлар маркази таҳлилига кўра, октябрь ойида кўчмас мулк бозорининг ҳудудлар кесимидаги динамикаси Тошкент вилоятида (+10 фоиз) сезиларли ўсди, шунингдек, Қорақалпоғистон Республикаси (+8,1 фоиз) ва Жиззах вилоятида (+7,5 фоиз) ижобий ўзгаришларни кўрсатди.
Таҳлиллар тижорат банклари томонидан ажратилган ипотека кредитлари ва аҳоли тасарруфидаги даромадлар уй-жой бозорига таъсир этувчи муҳим омиллар эканлигини кўрсатди.
Вазирлар Маҳкамасининг 2024 йил 11 ноябрдаги қарори билан уй-жой сотиб олиш учун субсидиялар ажратиш тартибига ўзгартириш ва қўшимчалар киритилди. Қарор билан субсидиялар билан қопланадиган фоиз тўловлари миқдорига ҳам ўзгартириш киритилди. Эндиликда янги кредитлар учун йиллик 12 фоиздан юқори қисми, 2025 йилдан бошлаб эса Марказий банкнинг асосий ставкасидан ортиқ қисми қопланади.
Бошланғич тўлов ва фоизларнинг бир қисмини қоплаш учун субсидиялар Иқтисодиёт ва молия вазирлиги томонидан беш иш куни ичида тўланади.
Изоҳ (0)