Ўзбекистонда ипотекани қайта молиялаштириш компанияси маблағлари ҳисобидан ажратилаётган ипотека кредит фоизлари пасайтирилди. Бу ҳақда “Ўзбекистон ипотекани қайта молиялаштириш компанияси” АЖ матбуот хизмати хабар берди.
Компания маблағлари ҳисобидан бирламчи бозордан уй-жой сотиб олиш учун ажратиб келинаётган ипотека кредити фоиз ставкаси 2 бандга пасайтирилган.
Эндиликда, ушбу кредит фоиз ставкаси – Марказий банк асосий ставкаси + 6 фоиз қилиб белгиланди (аввал асосий ставка + 8 фоиз эди). Бугунги кунда бу 19,5 фоизга тенг бўлади.
Кредит қисқача шартлари:
- муддати – 20 йил;
- бошланғич тўлов – камида 25 фоиз;
- кредит фоизи – 19,5 фоиз;
- энг кўп миқдори:
- Қорақалпоғистон Республикаси ва вилоятлар учун – 500 млн сўм;
- Тошкент шаҳрида – 800 млн сўм.
Аввалроқ Ўзбекистонда 2024 йилда жами 17,1 трлн сўм миқдоридаги ипотека кредитлари ажратилиб, 59 минг нафарга яқин фуқаролар уй-жой билан таъминлангани ҳақида хабар берилганди.
Ўзбекистонда уй-жой бозори
Аввалроқ Макроиқтисодий ва ҳудудий тадқиқотлар институти мутахассислари республикада уй-жой ва ипотека бозоридаги фаоллик даражасини таҳлил қилганди. Унга кўра, 2024 йилнинг III чорагида Ўзбекистон уй-жой бозорида фаоллик даражаси пасайди. Хусусан, июль сентябрь ойларида кўп қаватли уйлардаги квартиралар олди-сотдиси учун 41 861 та шартнома расмийлаштирилган. Ушбу кўрсаткич 2023 йилнинг мос давридагига нисбатан 3362 тага (7,4 фоизга) кам.
Иқтисодий тадқиқотлар ва ислоҳотлар маркази таҳлилига кўра, октябрь ойида кўчмас мулк бозорининг ҳудудлар кесимидаги динамикаси Тошкент вилоятида (+10 фоиз) сезиларли ўсди, шунингдек, Қорақалпоғистон Республикаси (+8,1 фоиз) ва Жиззах вилоятида (+7,5 фоиз) ижобий ўзгаришларни кўрсатди.
Таҳлиллар тижорат банклари томонидан ажратилган ипотека кредитлари ва аҳоли тасарруфидаги даромадлар уй-жой бозорига таъсир этувчи муҳим омиллар эканлигини кўрсатди.
Вазирлар Маҳкамасининг 2024 йил 11 ноябрдаги қарори билан уй-жой сотиб олиш учун субсидиялар ажратиш тартибига ўзгартириш ва қўшимчалар киритилди. Қарор билан субсидиялар билан қопланадиган фоиз тўловлари миқдорига ҳам ўзгартириш киритилди. Эндиликда янги кредитлар учун йиллик 12 фоиздан юқори қисми, 2025 йилдан бошлаб эса Марказий банкнинг асосий ставкасидан ортиқ қисми қопланади.
Бошланғич тўлов ва фоизларнинг бир қисмини қоплаш учун субсидиялар Иқтисодиёт ва молия вазирлиги томонидан беш иш куни ичида тўланади.
Изоҳ (0)