Тошкент шаҳар Яшнобод туманида лифт ичида одамлар билан тушиб кетгани ҳақида хабар берилганди. Саноат, радиация ва ядро хавфсизлиги қўмитаси ҳолат юзасидан маълумот берди.
Келтирилишича, қўмита томонидан юқорида кўрсатилган манзилда жойлашган лифт қурилмалари техник ҳолати кўрикдан ўтказилган. Шунда ўндан ортиқ камчилаклар борлиги, шунингдек, лифт қурилмасида кузатув-камера мосламаси, диспетчерлик алоқа хизмати, авария ҳолатлари тўғрисида хабар бериш воситаси ўрнатилмагани аниқланган.
Қўмита мутахассислари ва соҳага ихтисослаштирилган ташкилотлар вакиллари билан камчиликлар бартараф этиш бўйича техник хавфсизлик чоралари кўрилди.
Ҳолат юзасидан батафсил:
Яшнобод тумани Нормуҳаммедов даҳаси 12-уй лифти ичида одамлари билан тушиб кетган. Мазкур ҳолат вазир ўринбосари Озода Жўраева томонидан жойга чиқиб ўрганилган. Лифтнинг тўхташ қаватига келганда секинлаштириш функциясини амалга оширувчи датчик носозлиги туфайли ўз вақтида керакли сигнал етиб бормаган. Шу боис лифтнинг ҳимоя функцияси ишлаб, 2 ва 3 қаватлар оралиғида ҳаракатланишдан тўхтаган.
Воқеа жойига лифтга хизмат кўрсатувчи ташкилот вакиллари етиб келиб, аҳолини 4-5 дақиқа ичида чиқариб олишга муваффақ бўлган.
Озода Жўраева Яшнобод тумани ҳокими, Саноат, радиация ва ядро хавфсизлиги қўмитаси вакиллари ва бошқа мутасадди ташкилотлар билан ҳолатни муҳокама қилган. Бунда тизимни рақамлаштириш, кузатув механизмини янада кучайтириш лозимлиги таъкидланди.
Тошкент шаҳар ҳокимининг “Тошкент шаҳрида иқтисодиёт тармоқлари, ижтимоий ва энергетика соҳа объектлари ҳамда кўп квартирали уй-жой фондини 2025/2026 йиллар куз-қиш даврида барқарор ишлашга тайёрлаш чора-тадбирлари тўғрисида”ги қарори қабул қилинди. Қарорда Тошкентда 2025 йил охиригача 452 та лифт янгиланиши белгиланди.
Аввалроқ кўп квартирали уйларнинг лифтларини бошқариш ва мониторинг қилиш бўйича “Хавфсиз лифт” ягона идоралараро платформаси ишлаб чиқилаётгани ҳақида хабар берилганди.
Бугунга қадар кўп қаватли уйлардаги 8 942 та лифт техник кўрикдан ўтказилиб, улар бўйича паспорт ва мувофиқлик сертификати жорий этилади. Шу асосда келгуси 5 йилда 2 001 та лифт янгиланади ва 382 таси таъмирланади.
Изоҳ (0)