Бухоро вилоят ҳокими Ботир Зарипов иштирокида матбуот анжумани ташкил этилди. Касбий кўникмалар марказида бўлиб ўтган матбуот анжуманида вилоятда фаолият кўрсатаётган оммавий ахборот воситалари ходимлари, республика даврий нашрлари, интнрнет нашрлари, телеканалларининг вилоятимиздаги мухбирлари, журналист ва блогерлар, жамоатчилик вакиллари, қолаверса, мутасадди ташкилот ва идоралар раҳбарлари иштирок этдилар.
Матбуот анжуманида сўз олган вилоят ҳокими Ботир Зарипов тадбир қатнашчилари, оммавий ахборот воситалари ходимлари, блогер ва журналистларни муборак Рамазон ойи, баҳор айёми билан самимий муборакбод этиб, ўтган йилда вилоятни ижтимоий-иқтисодий ривожлантириш, шаҳар ва туманларда жумладан, қишлоқ хўжалиги, саноат ва ишлаб чиқариш, қурилиш, соғлиқни сақлаш, ёшлар таълими, спорт, инвестиция, сайёҳлик соҳаларида, бошқа муҳандислик-коммуникация тармоқларида амалга оширилган чора-тадбирлар, жойларда ишсизликни бартараф этиш, камбағалликни қисқартиришда жорий йилда жадал бошланган саъй-ҳаракат, рўёбга чиқарилаётган лойиҳалар хусусида атрофлича маълумот берди.
Эътироф этилганидек, Ватанимизда амалга оширилаётган ислоҳотларнинг бош мақсади инсонга, унинг эркин ҳаёти, қадр-қиммати ва фаровонлигига қаратилган бўлиб, бу борада “Ўзбекистон – 2030” стратегиясида 100 та муҳим мақсад ва йўналиш белгилаб берилган. Шундан келиб чиқиб, вилоятда аҳолининг турмуш тарзини яхшилаш, янги корхоналарни ташкил қилиш, ишлаб чиқариш, хизмат кўрсатиш соҳаларини ривожлантириш орқали аҳоли даромадини ошириш, турмуш тарзини яхшилашга алоҳида эътибор қаратилмоқда.
Таҳлиллардан кўринишича, иқтисодиёт соҳасида ялпи ҳудудий маҳсулот ҳажми 2024 йил якуни билан 71,6 триллион сўмга етказилиб, бу кўрсаткич 2023 йилга нисбатан 106,6 фоизга ошишига эришилган. Аҳоли бандлигини таъминлаш дастурлари доирасида 2024 йилда жами 236 минг нафар аҳолининг бандлиги таъминланган.
Чунончи, хорижга чиқиб кетган меҳнат мигрантларининг 608 нафари тартибли меҳнат миграцияси билан қамраб олинган ва 3 минг 647 нафар фуқаро мутахассисликка ўқитилган. Бу саъй-ҳаракат туфайли ҳудудда камбағаллик даражасини 2023 йилдаги 11,8 фоиздан 2024 йил якуни билан 7,3 фоизгача туширишга эришилган.
Президент томонидан тадбиркорларга яратилган шарт-шароит ва берилган имкониятларни инобатга олиб, тадбиркорлик субъектлари сони Бухоро вилоятида 35,4 мингтага етказилиб, бу 2023 йилга нисбатан 10,6 мингтага кўпайган. Тадбиркорлик фаолиятини қўллаб-қувватлаш учун тижорат банклари томонидан 2024 йилда 6,5 триллион сўм кредит маблағи ажратилган. Муҳими, бугунга келиб 76 минг нафар фуқаро айнан шу корхоналарда меҳнат қилишиб, моддий манфаат топишмоқда.
Масалан, янгидан иш бошлаган корхоналар қаторида Бухоро шаҳридаги "Бухара Некст женерейшн продукт" МЧЖни санаб ўтиш жоиз. Бу ерда қиймати 120 миллион АҚШ долларига тенг, қуввати 2 миллион дона электротехника ва маиший техника воситалари (телевизор, кондиционер, кир ювиш машинаси, чанг ютгич, электрочойнак ва микротўлқинли печ) ишлаб чиқариш лойиҳасини ишга тушириш ҳисобига 2 мингта янги иш ўрни яратилган.
Худди шундай, Пешку туманида “Бухоро Пештех” МЧЖ фаолиятини кенгайтириб, субъектда қиймати 190,6 миллиард сўмлик, йилига 5 минг тонна ип-калава ишлаб чиқариш лойиҳаси ишга туширилгани маҳаллий аҳоли вакилларининг 200 нафардан ортиғини иш билан бандлигини таъминламоқда.
Ёки Олот туманида “Арев Гурлешик” МЧЖ қўшма корхонаси томонидан электр энергияси таъминотида трансформатор пунктлари ва қувватлаш станцияларини ишлаб чиқаришни ташкил қилиш лойиҳаси амалиётга жорий қилинган. Бу ташаббус доирасида 15,1 миллион АҚШ долларига тенг тўғридан-тўғри хорижий инвестиция ўзлаштирилган.
Шунингдек, қурилиш-бунёдкорлик соҳасида 2024 йилда Бухоро вилоятида ижтимоий ва ишлаб чиқариш инфратузилмасини ривожлантириш дастури доирасида умумий қиймати 991,3 миллиард сўм маблағ эвазига 137 та объектни янгидан қуриш, реконструкция қилиш ва мукаммал таъмирлаш ишлари бажарилган. Жумладан, 42 та умумтаълим мактаби, 11 та мактабгача таълим, 12 та соғлиқни сақлаш, 1 та олий таълим муассасасида, 3 та спорт иншоотида мукаммал таъмирлаш ва қурилиш ишлари олиб борилган. Ифратузилма объектларини ривожлантириш мақсадида 15 та ичимлик сув таъминоти, 9 та автомобиль йўли, 11 та ирригация, 6 та мелиорация иншооти, 6 та электр таъминоти объекти янгидан қурилган.
Яна бир муҳим тармоқ, ўтган йилда вилоятда аҳолининг уй-жойга бўлган талабини қондириш мақсадида 127 та, жами 6010 та хонадонли кўп қаватли уй-жой замонавий андозалар асосида қуриб фойдаланишга топширилган. Жумладан, Қоракўл ва Ғиждувон туманларидаги “Янги Ўзбекистон” массивларида жами 360 хонадонга эга бўлган 18 та кўп қаватли турар жой иншооти, қолаверса, янгича тартиб ва дизайн асосида вилоятимизнинг бошқа ҳудудларида 109 та, жами 5 минг 650 хонадонли кўп қаватли уй-жой барпо қилиниб, асосан ёш оилаларга фойдаланишга топширилган.
Бундан ташқари, Бухорода сайёҳлик тизимини ривожлантириш, зиёрат туризми бўйича ҳам катта салоҳият шаклланган. Ўз навбатида, сайёҳларга зарур инфратузилмани яратиш мақсадида меҳмонхоналар сони 607 тага, сайёҳларга хизмат кўрсатувчи туристик корхона сони эса 186 тага етказилгани муносиб ютуқлардан, албатта. Соҳадаги ислоҳотлар туфайли вилооятимизда “Виндҳам”, “Меркурий”, “Саҳид” каби халқаро брендларга хос бўлган 2 та 4 юлдузли ва 4 та 3 юлдузли меҳмонхона қаторида “Ҳаят Реженси”, “Ҳилтон”, “Ramada” каби халқаро брендлар иш бошлаш арафасида.
Яна бир муҳим лойиҳалардан, Баҳоуддин Нақшбанд мажмуасида 500-600 йил аввал бунёд қилинган “Тоқи Миёна” зиёрат йўлаги қайта тикланди.
Бухоро вилоятида тарихий аҳамиятга эга туризм намойиш иншооти сони эса 300 тадан ошди. Зиёрат туризм йўналишида Сингапурда бўлиб ўтган “Halal Ин Travel — Глобал Summit 2024” умумжаҳон саммитида “Halal Ин Travel — Глобал Summit2024” мукофоти Бухорога топширилди. 2024 йил ноябрда “Халқаро зиёрат туризми ҳафталиги” доирасида Вобкентда “Ширин” туризм қишлоғи ва Ғиждувонда “Қўрғон” туризм маҳалласи мақомини олди. Умуман, ҳозирда вилоятнинг 9 та туманидаги 11 та ҳудудида “туризм қишлоғи” ташкил этилиши бўйича амалий саъй-ҳаракат олиб борилмоқда.
Американинг машҳур етакчи Неw Ёрк Times нашри Бухоро шаҳрини 2025 йилда ташриф буюришга энг муносиб жойлар рўйхатига киритди. Эндиликда 2025 йилда Бухоро тарихий марказида Жаҳон миқёсида анъанага айланган йирик Халқаро тасвирий-санъат анжумани (биенналеси)га тайёргарлик ишлари бошланган.
Ўз навбатида, матбуот анжуманида ҳозир бўлган оммавий ахборот восталари ходимлари ўзларини қизиқтирган қатор саволларга вилоят ҳокими ҳамда мутасаддилардан атрофлича жавоб олдилар.
Изоҳ (0)