Makroiqtisodiy va hududiy tadqiqotlar instituti mutaxassislari tomonidan 2025-yilning fevral oyida Toshkent shahrida uy-joylar uchun taklif etilgan ijara narxlari tahlil qilindi.
Poytaxtda o‘rtacha ta‘mirlangan xonadonlar ijara narxlari 2024-yilning noyabr oyidan beri arzonlab kelayotgan bo‘lsa, to‘liq ta‘mirlangan 3 va 4 xonali xonadonlar uchun o‘rtacha ijara narxlarida ko‘tarilish kuzatildi.
O‘rtacha ta‘mirlangan uy-joylar ijarasi
2025-yilning fevral oyida o‘rtacha ta‘mirlangan xonadonlar uchun ijara narxlari o‘tgan yilning oktyabr oyidan beri sezilarli arzonladi:
- 1 xonali: 323 dollar (o‘tgan yilning oktyabr oyiga (331 dollar) nisbatan -2.4 foiz);
- 2 xonali: 393 dollar (o‘tgan yilning oktyabr oyiga (414 dollar) nisbatan -5.2 foiz);
- 3 xonali: 480 dollar (o‘tgan yilning oktyabr oyiga (494 dollar) nisbatan -2.9 foiz);
- 4 xonali: 545 dollar (o‘tgan yilning oktyabr oyiga (623 dollar) nisbatan -12.5 foiz).
O‘rtacha ta‘mirlangan xonadonlar uchun taklif etilgan nisbatan arzon ijara narxlari:
- Sergeli tumani (1 xonali - 297 dollar, 2 xonali – 366 dollar, 3 xonali – 415 dollar, 4 xonali - 423 dollar);
- Olmazor tumani (1 xonali – 288 dollar, 2 xonali – 351 dollar, 3 xonali – 417 dollar, 4 xonali – 488 dollar).
Nisbatan qimmat ijara narxlari:
- Shayxontohur tumani (1 xonali – 347 dollar, 2 xonali – 462 dollar, 3 xonali – 568 dollar, 4 xonali – 694 dollar);
- Yakkasaroy tumani (1 xonali – 383 dollar, 2 xonali – 511 dollar, 3 xonali – 646 dollar, 4 xonali – 675 dollar).
To‘liq ta‘mirlangan uy-joylar ijarasi
Mazkur davrda to‘liq ta‘mirlangan xonadonlar uchun ijara narxlari o‘tgan yilning oktyabr oyiga nisbatan quyidagicha o‘zgardi:
- 1 xonali: 420 dollar (o‘tgan yilning oktyabr oyiga (422 dollar) nisbatan -0.6 foiz);
- 2 xonali: 592 dollar (o‘tgan yilning oktyabr oyiga (600 dollar) nisbatan -1.1 foiz);
- 3 xonali: 857 dollar (o‘tgan yilning oktyabr oyiga (834 dollar) nisbatan +2.8 foiz);
- 4 xonali: 1160 dollar (o‘tgan yilning oktyabr oyiga (1118 dollar) nisbatan +3.8 foiz).
To‘liq ta‘mirlangan uy-joylar uchun taklif etilgan nisbatan arzon ijara narxlari:
- Sergeli tumani (1 xonali – 323 dollar, 2 xonali – 417 dollar, 3 xonali – 517 dollar, 4 xonali – 639 dollar);
- Uchtepa tumani (1 xonali – 377 dollar, 2 xonali – 436 dollar, 3 xonali – 560 dollar, 4 xonali – 586 dollar).
Nisbatan qimmat ijara narxlari:
- Mirobod tumani (1 xonali – 485 dollar, 2 xonali – 746 dollar, 3 xonali – 1051 dollar, 4 xonali – 1344 dollar);
- Shayxontohur tumani (1 xonali – 515 dollar, 2 xonali – 748 dollar, 3 xonali – 1094 dollar, 4 xonali – 1462 dollar).
O‘zbekistonda uy-joy bozori
Avvalroq Makroiqtisodiy va hududiy tadqiqotlar instituti mutaxassislari respublikada uy-joy va ipoteka bozoridagi faollik darajasini tahlil qilgandi. Unga ko‘ra, 2024-yilning III choragida O‘zbekiston uy-joy bozorida faollik darajasi pasaydi. Xususan, iyul-sentyabr oylarida ko‘p qavatli uylardagi kvartiralar oldi-sotdisi uchun 41 861 ta shartnoma rasmiylashtirilgan. Ushbu ko‘rsatkich 2023-yilning mos davridagiga nisbatan 3362 taga (7,4 foizga) kam.
Iqtisodiy tadqiqotlar va islohotlar markazi tahliliga ko‘ra, oktyabr oyida ko‘chmas mulk bozorining hududlar kesimidagi dinamikasi Toshkent viloyatida (+10 foiz) sezilarli o‘sdi, shuningdek, Qoraqalpog‘iston Respublikasi (+8,1 foiz) va Jizzax viloyatida (+7,5 foiz) ijobiy o‘zgarishlarni ko‘rsatdi.
Tahlillar tijorat banklari tomonidan ajratilgan ipoteka kreditlari va aholi tasarrufidagi daromadlar uy-joy bozoriga taʼsir etuvchi muhim omillar ekanligini ko‘rsatdi.
Vazirlar Mahkamasining 2024-yil 11-noyabrdagi qarori bilan uy-joy sotib olish uchun subsidiyalar ajratish tartibiga o‘zgartirish va qo‘shimchalar kiritildi. Qaror bilan subsidiyalar bilan qoplanadigan foiz to‘lovlari miqdoriga ham o‘zgartirish kiritildi. Endilikda yangi kreditlar uchun yillik 12 foizdan yuqori qismi, 2025-yildan boshlab esa Markaziy bankning asosiy stavkasidan ortiq qismi qoplanadi.
Boshlang‘ich to‘lov va foizlarning bir qismini qoplash uchun subsidiyalar Iqtisodiyot va moliya vazirligi tomonidan besh ish kuni ichida to‘lanadi.
Izoh (0)