2022 йил 25 июнь куни Шимолий ва Жанубий Корея ўртасида бўлиб ўтган қонли урушга 72 йил тўлди.
Низо 1950 йилда коммунистик Шимолий Корея қўшинлари 38-параллел орқали Жанубий Корея ҳудудига тўсатдан ҳужум бошлаганидан кейин юзага келган. АҚШ бошчилигидаги БМТ кучлари Хитой ва Собиқ Иттифоқ томонидан қўллаб-қувватланаётган Шимолий Корея билан жанг қилди. Оқибатда 3 миллион аскар ва тинч аҳоли вакиллари ҳалок бўлди, 5 миллион киши қочқинга айланди.
Корея уруши тахминан ўзи бошланган жойда — 38-параллел яқинида тугади. 1953 йил 27 июлда имзоланган сулҳ иккала томоннинг ҳам ўз кучларини у ердан икки километр нарига олиб кетишини ва қуролсизлантирилган ҳудуд ташкил этилишини назарда тутарди. Ушбу ҳудуд дунёдаги энг қаттиқ ҳимояланган чегара бўлиб қолмоқда, унинг ҳар икки томонига қарийб бир миллион аскар жойлаштирилган.
Шимолий Корея ярашув битими тузилган 1953 йил 27 июль кунини «Улуғ ватан озодлик урушидаги ғалаба куни» деб атайди ва АҚШнинг Жанубдаги ҳарбий иштирокини ярим оролдаги низо сабабчиси деб ҳисоблайди. Шимолий Корея сулҳ АҚШнинг мағлубиятини белгилаб, коммунистик мамлакатнинг суверенитетини ҳимоя қилганини айтади.
Бу йил Шимолий Корея камида 18 марта ўз қуроллари синовини ўтказди, бу унинг ядро ва ракета арсеналлари ривожланаётганини кўрсатади.
Шу ой аввалида АҚШда жойлашган таҳлил маркази Шимолий Корея ўз ядро полигонида ишларни кенгайтириб, иккинчи туннелни ишга туширишга тайёрланаётган бўлиши мумкинлигини маълум қилди.
Вашингтон Шимолий Кореянинг 2017 йилдан буён биринчи ядровий синови «ҳар қандай вақтда» юз бериши мумкинлиги ҳақида огоҳлантирди. Хитой бундай ҳолат содир бўлишини истамаслигини айтиб, қисман шу сабабли май ойида БМТнинг баллистик ракеталар учиришни қайта бошлаган Пхеньянга қарши янги санкциялар киритиш таклифига вето қўйганди.
Май ойида лавозимига киришган Жанубий Корея президенти Юн Сук Ёл шимолга нисбатан қатъийроқ позиция эгаллашга ваъда берди ҳамда Сеулдаги саммитда АҚШ президенти Жо Байден билан қўшма ҳарбий машғулотларни ва уларнинг биргаликдаги тийиб туриш позициясини кучайтиришга келишиб олди.
Бунга жавобан эса Шимолий Корея «мудофаа қобилиятини мустаҳкамлаш ва ривожлантириш» мақсадида қуролланишга кўпроқ урғу бермоқда. Жумладан, Шимолий Корея етакчиси Ким Чен Ин кеча 24 июнь куни қуролли кучларни қайтадан ташкил этиш бўйича қарор қабул қилди. Унга кўра Шимолий Корея армиясининг мутлақ кучи ва ҳарбий-техник қудратини доимий сақлаб туриш ва тинимсиз ошириш бориш учун зарур чоралар кучайтирилади.
Хулоса ўрнида айтадиган бўлсак, ҳозирча томонлар ўртасидаги муносабатларнинг илиқлашиши ҳақида умуман гап-сўз йўқ. Ҳар икки Корея энг ёмон оқибатларга максимал даражада тайёр бўлиш учун барча чораларни кўрмоқда.
Изоҳ (0)