Беларусь президенти Александр Лукашенко Минск вилоятига иш сафари чоғида мамлакат ҳудудидан ядро қуролини қўллаш шартини айтиб ўтди. Бу ҳақда унинг матбуот хизмати хабар берди.
Лукашенкога кўра, Беларусь ҳудудидан ядро қуролини қўллаш учун фақат битта сабаб бўлиши мумкин – бу мамлакатга қарши тажовуз. Президент бу “ушлаб турувчи қурол” экани ва “бундай қуролга эга бўлган давлатга қарши уруш қилишни ҳеч ким хоҳламаслиги”ни айтди.
Беларусь раҳбари ядро қуролидан фойдаланишга тўғри келадиган вазиятлардан қочишни хоҳлашини билдирди.
“Ҳозирги замонда бу қуроллардан фойдаланишга қарор қилишимдан ўзи сақласин. Аммо бизга қарши агрессия бўлса, ҳеч қандай ядро қуролидан фойдаланиш борасида иккиланиш бўлмайди”, — деди у.
Сиёсатчи яна бир бор Беларусда ядро қуролининг жойлаштирилиши унинг илтимоси ва хавфсизликни кафолатлаш мақсадида Россия томонига қўйилган шошилинч талаб эканини эслатди.
“Аввалига мен Путиндан сўрадим. Кейин зудлик билан дўстона тарзда талаб қилдим, ҳозирча менга тактик қуролни қайтариб беришни айтдим. Бу мен учун етарли”, — деди Лукашенко.
Ҳозирги босқичда Лукашенко Беларусда стратегик ядровий қуролларни жойлаштириш заруриятини кўрмаяпти, аммо “мамлакатда бу қуроллар учун иншоотлар тайёрланмоқда, уларнинг барчаси яхши аҳволда”.
Беларусда ядровий қурол жойлаштирилиши
25 май куни Минскда Россия мудофаа вазири Сергей Шойгу ва Беларусь мудофаа вазирлиги раҳбари Виктор Хренин ўртасида учрашув бўлиб ўтди, унда стратегик бўлмаган ядро қуролларини Беларусь Республикасига жойлаштириш тўғрисидаги ҳужжат имзоланди.
“Россия Беларусга ядро қуролини бермаяпти: улар устидан назорат ва улардан фойдаланиш бўйича қарор Россия томонида қолади”, — деди Шойгу.
Шунингдек, у Москва ҳарбий-сиёсий вазиятни ҳисобга олган ҳолда, келажакда “Иттифоқ давлати хавфсизлигини таъминлаш бўйича қўшимча чоралар” кўриш ниятида эканини айтди. Россия мудофаа вазири аллақачон кўрилган чоралар барча мавжуд халқаро-ҳуқуқий мажбуриятларга мос келишини билдирди.
Ўша куни Александр Лукашенко Минск Россиядан келаётган ядро қуроллари хавфсизлиги учун масъул эканини таъкидлади ва унинг мамлакати ҳудудига ҳеч қандай диверсантлар кира олмаслигини айтди.
26 май куни Украина президенти девони раҳбари маслаҳатчиси Михаил Подоляк Россиянинг қўшни Беларусда ядро қуролини жойлаштириши Ядро қуролини тарқатмаслик тўғрисидаги шартномани бузиш эканини билдирди.
Изоҳ (0)