Тошкент шаҳрининг Яккасарой туманидаги рассомчилик мактаби ўқитувчиси дарс пайтида ўқувчи қизга шилқимлик қилгани учун 5 суткага қамалганди. Болалар омбудсмани суд қарорига протест киритди.
2025 йил 3 март куни Тошкент шаҳар жиноят ишлари бўйича Яккасарой туман судида 2015 йилда туғилган вояга етмаган А.Б.га қарши содир этган шаҳвоний шилқимлик ҳаракатлари юзасидан ўқитувчи М.Д.нинг қилмиши кўриб чиқилган ва унга Маъмурий жавобгарлик тўғрисидаги кодекснинг 41-1-моддаси 1-қисми билан (шаҳвоний шилқимлик қилиш) 5 сутка маъмурий қамоқ жазоси тайинланган.
Болалар омбудсмани чиқарилган қарорни бола ҳуқуқларини таъминланиши нуқтайи назардан ўрганиб, ушбу қарор боланинг манфаатига зидлиги муносабати билан Тошкент шаҳар прокуратурасига мазкур суд қарори устидан апелляция тартибида протест билдиришга оид илтимоснома киритган.
Тошкент шаҳар прокуратурасининг болалар омбудсмани илтимосномасини кўриб чиқиши юзасидан билдиришича, биринчи инстанция судининг мазкур қарори устидан апелляция тартибида прокурор протести киритилди.
Натижада Тошкент шаҳар судининг 4 мартдаги апелляция тартибидаги қарори билан биринчи инстанция судининг М.Д.га нисбатан қарори бекор қилиниб, иш материаллари қўшимча терговга қадар текширув юритиш учун туман прокуратурасига қайтарилган ва ҳозирда тергов ҳаракатлари олиб борилмоқда.
Изоҳ (0)