Хоразм вилояти Хонқа туманида дарс пайти 3-синф қизларига шаҳвоний шилқимлик қилган 61 ёшли ўқитувчи 5 суткага қамалганди. “Немолчи.уз” лойиҳасида унинг қилмиши нотўғри малакалангани ва жиноят иши қўзғатилиши кераклиги айтилгач, Хоразм вилояти судлари бунга муносабат билдирди.
Унда айтилишича, иш ҳолатига кўра, ҳуқуқбузар Б.Р. вояга етмаган 3-синф ўқувчилари С.К. ва М.Э.га нисбатан дарс пайтида шаҳвоний шилқимликда ифодаланувчи маъмурий ҳуқубузарликни содир этганликда айбдор деб топилган.
Маъмурий жавобгарлик тўғрисидаги кодексга 11 апрелда киритилган янги 41-1-модда 1-қисмида, шаҳвоний шилқимлик қилиш, яъни шахсга нисбатан унинг учун номақбул бўлган ҳамда унинг шаъни ва қадр-қимматини таҳқирлайдиган, шахснинг ташқи қиёфасини ёки қадди-қоматини тавсифлашда, имо-ишора қилишда, тегинишда, чақиришда ифодаланган, шаҳвоний хусусиятга эга бўлган ҳаракатларни бир марта қўпол равишда ёки бир неча марта содир этганлик учун жавобгарлик белгиланган бўлиб, мазкур ҳуқуқбузарлик санкциясида базавий ҳисоблаш миқдорининг 2 бараваридан 5 бараваригача миқдорда жарима ёки 5 суткагача муддатга маъмурий қамоқ жазоси назарда тутилган.
Жиноят ишлари бўйича Хонқа туман суди томонидан ҳуқуқбузар Б.Р.га мазкур модда санкциясида назарда тутилган максимал жазо, яъни 5 сутка маъмурий қамоқ жазоси тайинланган.
Мамурий жавобгарлик тўғрисидаги кодекснинг 324-1моддасига мувофиқ, маъмурий ҳуқуқбузарлик тўғрисидаги иш юзасидан тарафларга суд қарорларидан норози бўлган тақдирда қонунда белгиланган тартибда Хоразм вилоят судининг жиноят ишлари бўйича судлов ҳайъатига аппеляция шикояти (протести) келтиришлари мумкинлиги тушунтирилган.