Андижон ва Тошкент вилоятларида энергия ресурсларидан ноқонуний фойдаланганлик ҳолатлари фош этилди, деб хабар бермоқда Прокуратура департаменти ахборот хизмати.
Унга кўра, Бош прокуратура ҳузуридаги департаментнинг Асака ва Андижон тумани бўлимлари ва ИИБ ходимлари ҳамкорлигида тезкор тадбирлар ўтказилган. Унда фуқаро А.Э. ва “Т.Д.” оилавий корхонаси масъул шахслари яшаш хонадони ва корхонага қарашли ошхонада тижорат мақсадида умумий фойдаланишдаги электр тармоғига ўзбошимчалик билан уланиб, жами 418,2 млн сўмлик электр энергиясидан ноқонуний фойдалангани аниқланган.
Шу каби, департаментнинг Қибрай тумани бўлими ва ДХХ ходимлари ҳамкорлигида ўтказилган тезкор тадбирда К.Т. “Обод” МФЙ ҳудудидаги гул етиштиришга мўлжалланган иссиқхонасида умумий фойдаланишдаги табиий газ тармоғига ерости орқали яширинча уланиб, 240,9 млн сўмлик табиий газдан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Аввалроқ Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)