Ўзбекистонда электр ва газ истеъмоли учун ижтимоий меъёрларнинг амал қилиш муддатлари об-ҳаво шароитларидан келиб чиқиб қайта кўриб чиқилади. Бу Вазирлар Маҳкамасининг 28 февралдаги қарорида назарда тутилган.
2024 йил 1 майдан бошлаб маиший истеъмолчилар (аҳоли хонадонлари) учун электр энергияси ва табиий газдан фойдаланишда ижтимоий (базавий) меъёрлар киритилган эди.
“Ҳаво ҳароратидан келиб чиқиб, Энергетика вазирлиги Вазирлар Маҳкамаси билан келишган ҳолда, мазкур базавий меъёрларнинг иситиш ва бошқа мавсумлардаги амал қилиш муддатларига ўзгартириш киритиши мумкин”, дейилади ҳужжатда.
Энергетика вазирлиги, “Ҳудудий электр тармоқлари” АЖ ва “Ҳудудгазтаъминот” АЖ базавий меъёрларнинг амал қилиш муддатларига киритилган ўзгартиришлар тўғрисида ўзининг расмий веб-сайти ҳамда оммавий ахборот воситалари орқали эълон қилиб боради.
Ушбу ваколат доирасида Ўзбекистонда табиий газ учун иситиш мавсумида белгиланган базавий меъёр 1 апрелга қадар узайтирилди. 1 мартдан мамлакатда иситиш мавсумида табиий газ учун жорий қилинган 500 кубометрлик базавий меъёр 100 кубометрга туширилиши белгиланган эди. Март ойида ҳаво ҳароратининг паст бўлиши, ҳатто айрим кунлари кечаси ва кундузи ҳарорат 0 даражадан тушиб, одатдагидан кўра совуқроқ келиши кутилаётгани, қолаверса, аҳолига қулайлик яратиш мақсадида, давлат раҳбарининг топшириғига мувофиқ, Вазирлар Маҳкамасининг тегишли қарори билан иситиш мавсуми учун белгиланган 500 кубометр базавий меъёр 2025 йилнинг 1 апрелигача узайтирилди.
Изоҳ (0)