Тошкент шаҳри ва Андижон вилоятида энергия ресурсларидан ноқонуний фойдаланганлик ҳолатлари аниқланди. Бу ҳақда Прокуратура департаменти хабар берди.
Унга кўра, ҳолатлардан бири Бош прокуратура ҳузуридаги департаментнинг Олмазор тумани бўлими томонидан ўтказилган терговга қадар текширувларда аниқланган. А.А. ва Ж.И. ўзларига тегишли нотурар бино ва яшаш хонадонида тижорат мақсадида умумий фойдаланишдаги газ ва электр тармоқларига ўзбошимчалик билан уланиб, жами 365,2 млн сўмлик энергия ресурсларидан ноқонуний фойдаланган.
Шу каби департаментнинг Избоскан тумани ва Хонобод шаҳри бўлимлари томонидан ўтказилган терговга қадар текширувларда ЯТТлар А.И. ва У.Т. нотурар бино ва дам олиш масканларида тижорат мақсадида умумий фойдаланишдаги электр тармоғига ўзбошимчалик билан тўғридан-тўғри уланиб, жами 688,2 млн сўмлик электр энергиясидан ноқонуний фойдаланиб келгани аниқланди.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Аввалроқ Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)