Ўзбекистоннинг иккита ҳудудида энергия ресурсларидан ноқонуний фойдаланиб келган шахслар аниқланди. Бу ҳақда Бош прокуратура ҳузуридаги департамент хабар берди.
Навбаҳор ва Балиқчи тумани бўлимлари томонидан ўтказилган терговга қадар текширувларда фуқаролар М.Д. ва И.О. ўз хонадонларида ўзбошимчалик билан газ тармоғига тўғридан тўғри улангани маълум бўлди. Улар 275,1 млн сўмлик табиий газдан ноқонуний фойдаланган.
Шунингдек, Қорақалпоғистон Республикасининг Амударё туманида фуқаро Ф.А. хонадонида ўзбошимчалик билан электр тармоғига уланиб олган. У 106,4 млн сўмлик электр энергиясидан ноқонуний фойдаланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Аввалроқ Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)