Ўзбекистонда 2024 йил бошидан буён қуёш ва шамол электр станциялари томонидан 4 млрд кВт/соатдан ортиқ электр энергияси ишлаб чиқарилди. Бу ҳақда Энергетика вазирлиги матбуот хизмати хабар берди.
Қайд этилишича, бугунги кунда Ўзбекистоннинг 7 та вилоятида умумий қуввати 2,7ГВт бўлган 9 та қуёш фотоэлектр станцияси ҳамда битта шамол электр станцияси “яшил” энергия ишлаб чиқармоқда.
Ушбу “яшил” электр станциялар томонидан 2024 йил 31 май соат 15:00 га қадар 1 млрд кВт/соат миқдорида, 2024 йилнинг биринчи ярим йиллигида 1,6 млрд кВт/соат миқдорида, 2024 йил 17 июль соат 18:20 ҳолатига 2 млрд кВт/соат ва 2024 йил 30 август ҳолатига кўра эса 3 млрд кВт/соат миқдорида электр энергияси ишлаб чиқарилган.
20 октябрь соат 12:00 да мамлакатдаги барча қуёш ва шамол электр станциялари томонидан ишлаб чиқарилган электр энергияси миқдори 2024 йил бошидан 4 млрд кВт/соатни ташкил қилди.
Таъкидланишича, шу пайтгача қуёш электр станциялари томонидан 3 млрд 493,6 млн кВт/соат, шамол электр станцияси томонидан эса 506,4 млн кВт/соат электр энергияси ишлаб чиқарилди.
Бунинг натижасида:
- 1,2 млрд куб метр табиий газ тежалишига эришилди;
- атмосферага 1 млн 680 минг тонна зарарли газлар чиқишининг олди олинди.
Мазкур ҳажмдаги электр энергияси 2 миллион хонадоннинг 10 ойлик ёки 1 млн 666 мингта хонадоннинг бир йиллик ижтимоий нормасини ташкил қилади.
Навоий ва Самарқанд вилоятларидаги қуёш фотоэлектр станциялари 2022 йилда 434 млн кВт/соат, 2023 йилда эса 576,9 млн кВт/соат электр энергияси ишлаб чиқарган эди.
Аҳоли ва иқтисодиёт тармоқлари талабидан келиб чиқиб, келгуси уч йилда 8 гигаваттли 28 та йирик қуёш ва шамол электр станцияларини ишга тушириш, 944 километр юқори кучланишли электр тармоқлари ва 6 та йирик подстанцияни қуриш, жами 2,2 гигаватт бўлган 18 та электр сақлаш қувватларини ўрнатиш режалаштирилган.
Изоҳ (0)