Энергетика вазирлиги жорий йилда Ўзбекистондаги қуёш ва шамол электр станциялари томонидан қанча электр энергияси ишлаб чиқарилганини маълум қилди.
“Бугун соат 16:45 ҳолатига кўра, Ўзбекистондаги қуёш ва шамол электр станциялари томонидан 2024 йил бошидан бери ишлаб чиқарилган электр энергияси миқдори 3 млрд кВт⋅соатни ташкил қилди.
Айтиш жоизки, бугунги кунда мамлакатимизнинг 7 та вилоятида умумий қуввати 2,4 ГВт бўлган 9 та қуёш фотоэлектр станцияси ҳамда битта шамол электр станцияси “яшил” энергия ишлаб чиқармоқда.
![](/static/2024/08/30/quyosh1-V-pFILue.jpg)
Ушбу “яшил” электр станциялар томонидан 2024 йил 31 май соат 15:00 га қадар 1 млрд кВт соат миқдорида, жорий йилнинг биринчи ярим йиллигида 1,6 млрд кВт соат миқдорида, 2024 йил 17 июль соат 18:20 ҳолатига кўра эса 2 млрд кВт соат миқдорида электр энергияси ишлаб чиқарилган эди.
Шу пайтгача қуёш электр станциялари томонидан 2 млрд 677,8 млн кВт соат, шамол электр станцияси томонидан эса 322,2 млн кВт соат электр энергияси ишлаб чиқарилди.
Бунинг натижасида:
— 983,3 млн куб метр табиий газ тежалишига эришилди;
— атмосферага 1 млн 291,1 минг тонна зарарли газлар чиқишининг олди олинди”, — дейилади хабарда.
Маълумот учун: мазкур ҳажмдаги электр энергияси 1 миллион 875 мингта хонадоннинг 8 ойлик ёки 1 млн 250 мингта хонадоннинг бир йиллик ижтимоий нормасини ташкил қилади.
Шунингдек, Энергетика вазирлигининг хабар беришича, ушбу кўрсаткичлар йил якунига қадар мазкур электр станциялар ва янги генерация қувватлари (“яшил” станциялар) ҳисобидан 5 млрд 740 млн кВт соатга етиши кутилмоқда.
Навоий ва Самарқанд вилоятларидаги қуёш фотоэлектр станциялари 2022 йилда 434 млн кВт⋅соат, 2023 йилда эса 576,9 млн кВт⋅соат электр энергияси ишлаб чиқарган эди.
Изоҳ (0)