Турк шоу-бизнеси оламидаги янгиликларни ўтказиб юборган мухлислар учун июль ойининг сўнгги кунларида машҳур актёр ва актрисалар ҳаётида бўлиб ўтган энг қизиқарли хабарларни тўпладик.
Юлдузли жуфтликлар ичида энг намунавий оилалардан бири дея эътироф этилган актёрлар — Бариш Ардуч ва Гупсе Ўзай Туркиянинг Алачати курорт шаҳрида дам олиш кунларини мароқли ўтказмоқда. Юлдузлар кўчада сайр қилиб юрган вақтда журналистлар қуршовида қолди ва атрофга йиғилган барча мухлислар билан дўстона суҳбатлашди. Ардуч ва Ўзай хоҳловчилар билан бирга эсдалик учун суратга тушди ва барчада илиқ таассурот қолдирди.
Сўнгги кунларда Ҳакан Курташ билан муносабати туфайли матбуотда доимий равишда тилга олинаётган Бирже Акалай яна объектив эътиборига тушди. Кечаси актриса қаллиғи Ҳакан билан касалхонага борди. Маълум бўлишича, у ҳозирда суратга олинаётган “Қабристон” сериали сёмка жараёнларида йиқилиб тушган. Текширувлар Акалайнинг жиддий жароҳат олмагани ва унинг соғлиғи яхши эканлигини тасдиқлади.
“Ижарага олинган севги” лойиҳасидаги Дефне роли билан машҳур бўлган Элчин Сангу хонанда Карсунинг концертига ташриф буюрди ва у ерда журналистларга интервью берди. Актриса узоқ вақт давомида экранларда кўринмагани сабабини соғлиғи билан изоҳлади: “Бир муддат давомида мен психотерапевт ёрдамига муҳтож бўлдим”, дея тан олди актриса.
Сўнгги марта Бодрумдаги спорт марказларидан биридан чиқиб келаётган вақтда мухлислар эътиборига тушган Киванч Татлитуғ шунчаки дам олаётганини айтди. “Янги мавсумда сиз кутмаган ҳодисалар бўлади”, дея актёр янги лойиҳалар борлигига ишора қилди.
Маълумотларга кўра, актёрга учта лойиҳада: “Буюк қочиш”, “Албор оиласи” ва “Ишғол вақтидаги муҳаббат” каби сериалларда суратга тушиш таклиф этилган. Актёр қайси лойиҳани танлагани ҳозирча номаълум. Агар Киванч Татлитуғ “Ишғол вақтидаги муҳаббат” лойиҳасида иштирок этса, унинг партнёри Неслиҳан Атагул бўлади.
“Еттинчи бўлмадаги мўжиза” фильми юлдузи Илкер Аксум куни кеча турмуш ўртоғи Дилай Экмекчиўғлудан ажойиб хушхабар олди. Унинг рафиқаси ҳомиладорликнинг 8-ҳафтасида.
Уч ой аввал она бўлган актриса Эда Эже турмуш ўртўғи, баскетболчи Буграҳан Тунчерни Instagram’даги обуначилари рўйхатидан ўчириб ташлади. Бу эса юлдузлар оиласи ажрашиши ҳақидаги турли салбий миш-мишларни келтириб чиқарди.
Бунга жавобан Эда Эже журналистга матбуотда пайдо бўлган ажралиш ҳақидаги хабарларга аниқлик киритди: “Ажрим ҳақидаги хабарларнинг бари ҳақиқатдан йироқ. Бугра шундоқ ҳам Instagram’дан фойдаланмайди, у ўз профилини ўчириб ташлашни истаган эди. Бизнинг эндигина уч ойни қаршилаган фарзандимиз бор. Қандай қилиб биз ажралишимиз мумкин? Майли, мен бундай хабарларга ўрганиб қолганман. Биз ҳозирда бахтлимиз ва қизимиз парвариши билан бандмиз”, деди актриса.
Хонанда Карсу концертига турмуш ўртоғи Умут Эверген билан ташриф буюрган Алина Бўз журналист билан суҳбатлашди. Айтишларича, улар яқинда Москвадан қайтишган:
“Биз оила аъзоларимиз олдига меҳмонга кетган эдик. Умутга болалигим ўтган жойларни кўрсатдим, Россия турмуш ўртоғимда ижобий таассурот қолдирди. Бу давр биз учун унутилмас воқеа бўлди”, деди актриса.
“Жангчи” сериалида бирга рол ижро этган Берк Октай ва Йилдиз Чагри Атиксой 2022 йилда турмуш қурган. 2024 йил май ойида улар қиз фарзандли бўлишди ва чақалоққа Мира Милена дея исм қўйишди.
Ҳозирда илк бор ота бўлишдан хурсанд бўлган Берк Октай вақти-вақти билан фарзандининг юзини кўрсатмасдан ижтимоий тармоқларда қизи билан тушган суратларини баҳам кўради.
Ва унинг рафиқаси ҳам чақалоқ бармоғини ушлаб турган лаҳза акс этган суратни жойлади ва унга: “Қалбимни эритиб юборди” дея изоҳ қолдирди.
Изоҳ (0)