Исроилнинг Ғазога қилган ҳужуми оқибатида ҳалок бўлганлар сони 30 минг кишидан ошиб кетди. Қурбонлар ортиб бораётгани сабабли Иброҳим Аҳмад қурувчилик касбини гўрковликка ўзгартирди. Бу ҳақда Reuters хабар берди.
Ғазонинг 2,3 миллионлик аҳолиси каби уйидан кўчирилган Аҳмад Рафаҳдаги Тал Ал-Султон қабристонидаги қумлоқ ерларда қабрлар қазиб, қабр тошлари йўқлиги учун уларга цемент блоклар ўрнатади.
30 минг шаҳид бу катта рақам. Агар буни бутун дунё бўйлаб содир этилган барча урушлар билан солиштирадиган бўлсак, иккита жаҳон уруши, ҳатто Хиросима ва Нагасаки қирғинидан ташқари, сионистик душман томонидан Фаластин халқига қарши содир этилган жиноятчилик ва геноцид билан бу рақамларга етиб бормайди. Шунинг учун барча виждони уйғоқларга мурожаат қиламан: Фаластин халқига қарши геноцидни тўхтатинг, бу жиноятларни тўхтатинг, очарчиликни тўхтатинг. Буларнинг бари халқимизга қарши сионистик душман ҳаракатидир. Бизнинг одамлар яшашга ҳақли, — дейди у.
Иброҳим Аҳмад қурувчи қилганида иш фаолияти қийин бўлгани, лекин уйга яхши кайфият билан қайтгани, ҳозирги фаластинликлар нигоҳида тушкун ҳолат сақланиб қолганини айтди.
Гўрковликни тўхтатишни хоҳлардим. Ўлим бу тақдир, у Худонинг амри, лекин уруш тугашини хоҳлайман. Шунда қабрлар қазиш ўрнига, мамлакатни қурардик, уни тиклардик. Қабрлар қуришдан тўйдик. Худо хоҳласа, турар жой бинолари қуришимизга, бу юрт учун янги уфқлар очиб, уни қайта тиклашимизга умид қиламан. Ҳафсаламиз пир бўлган даражага етдик.
Ўзим яхши кўрган виллалар ва бинолар қуришдан гўрковликка ўтишим қийин. Лекин муаммо эмас, ишлайлик, дедим. Ҳақиқат шуки, қабр қазиш осон эмас, қийин иш. Бу ерда 3-4 ойдан бери ишлаяпман ва кўп нарсаларни кашф қилдим. Табиий сабаблар ёки ҳаво ҳужумларида ҳалок бўлганлар туфайли кўмишга олиб келинган жасадлар сони кўп. Одатдаги рақам икки-уч киши, бу кўрсаткич ҳафтасига эмас, кунига шунчани ташкил этади. Аммо айрим кунлари бизга 30-40 жасад келади, бу жуда катта рақам, — дейди Аҳмад.
Гўрков у ишлаётган жойда иккита оммавий қабристон борлиги, бирида 80 киши, иккинчисига 100 киши кўмилганини айтди.
Бу ерда одамларни текинга дафн этишади, бу иш учун ҳеч ким пул олмайди. Лекин бу ердаги аҳволимиз бизни дафн этилганлар сонининг юкини кўтаришга мажбур қилади. Бундан олдинги ишим қийин эди, лекин уйга муваффақият ҳисси билан қайтардим. Янги нарсалар қилардим, ҳар куни бошқа бино, бошқа декорация. Яхши кайфиятда уйга келардим. Ҳозирги ишим асли касбим бўлмаса ҳам, муқобил вариант йўқлиги сабабли касбим деб ҳисоблашим керак. Бугунги ҳаётим аввалгисига ўхшамайди.
Уйга кетасан, эрталаб қабристонга келасан, ишлайсан, одамларни кўрасан. Бир хил юзли турли одамларни кўраман, азоблари бир. Бу депрессияни келтириб чиқаради. Одатдаги тартибдай уйга қайтасан, ҳатто уйда ҳам ўзингни қулай ҳис қилмайсан, чунки эртаси куни қабрга борасан. Яшаш йўқ, шунчаки вақт ўтаётганини кўрасан. Келажагинг қандай? Фарзандларингни келажаги қандай? Қайси нарсаларни режалаштириш ёки қилиш керак? Фарзандларни ўқитиш ва уларга бошқа кўп нарсаларни ўргатиш керак, лекин ҳафсаланг пир бўлади, умидингни йўқотасан, бундай вазиятда нима қилиш мумкинлигини билмайсан. Худога илтижо қиламан, бир ечим топилади, биз ва фарзандларимиз учун яхши келажакни кўрамиз, — таъкидлайди гўрков.
Иброҳим Аҳмад ўлим, вайронагарчилик, биноларни бузиш, одамларни кўчириш етарли эканини айтди. У уруш тўхтаб, Ғазо сектори қайта тикланишига ишонч билдирди.
Қабрлар, шаҳидлар, қон ва вайронагарчилик, даҳшатли ҳолат, сизга нима дейишни билмайман, бу назоратдан ташқарида. Музокараларда олға силжиш бўлишига умид қиламан, ўз ишимизга ечим топиб, ҳақ-ҳуқуқимизни олиш учун Аллоҳга илтижо қиламиз, — дея хулоса қилди у.
Изоҳ (0)