Россия Мудофаа вазирлиги “Ватан ҳимоячилари пантеони” ҳарбий қабристонини кенгайтириш учун Москва вилоятида жойлашган Пироговский ўрмон боғининг 17 гектар майдонини ўз фойдаланишига олди. Бу ҳақда 3 май куни “Новая газета Европа” хабар берди.
Мудофаа вазирлигининг Россиядаги энг йирик ҳарбий қабристонни кенгайтириш бўйича режалари аввалроқ Митиши шаҳар округи маъмурияти томонидан тасдиқланган. Туман маъмурияти гўёки “пантеон”ни кенгайтириш учун 10 гектар ва шаҳар қабристонини қуриш учун 7 гектардан фойдаланишини айтган.
Кейинчалик Ватан ҳимоячилари пантеонига айланган Федерал уруш ёдгорлиги қабристонида 2013 йил июнидан 1 июлгача 353 та дафн ўтказилган. 2022 йил 24 февралдан бошлаб фақат Украинадаги фронтда ҳалок бўлганлар дафн этилган секторга 900 дан ортиқ қабрлар қўшилган.
Қабристонда ҳарбий шараф билан дафн маросимлари ҳар куни бўлиб ўтади, — дейди ёдгорлик ёнидаги қишлоқ аҳолиси.
Режалаштирилган кенгайтиришдан олдин қабристон майдони 52,24 гектар бўлган, келгуси 200 йил ичида бу ҳудудда 40 минг қабр жойлаштирилиши мумкин деб тахмин қилинган эди.
BBC 2024 йил 26 апрель ҳолатига кўра, Украинада 51 679 нафар россиялик ҳарбий ҳалок бўлганини тасдиқлаган.
2024 йил февраль ойи охирида Украина президенти Владимир Зеленский уруш бошланганидан бери биринчи марта мамлакатнинг ҳарбий йўқотишларини эълон қилган — унинг сўзларига кўра, улар 31 минг кишини ташкил қилган. Россия расмийлари Украинадаги йўқотишлар ҳақида расмий маълумотларни эълон қилмаган.
Изоҳ (0)