Ўзбекистондаги маданий мерос объектларига 120 дан ортиқ реклама баннерлари ўрнатилгани аниқланди
Маданий мерос объектларида ташқи реклама жойлаштириш «Реклама тўғрисида»ги қонунга асосан қатъий тақиқланиб, ушбу объектлар ва уларнинг ёндош ҳудудлари рекламадан ҳоли этиб белгиланган. Бироқ жойларда мазкур қонун талабини қўпол равишда бузиш ҳолатлари кузатилмоқда, деб хабар беради Бош прокуратура матбуот хизмати.
Маълум қилинишича, прокуратура идоралари томонидан мутасадди идоралар биргаликда 5 та қадимий шаҳарда жойлашган 1000 дан ортиқ маданий мерос объектида реклама ва ахборот кўрсатгичлари ўрнатилиши қонунийлиги ўрганилган. Унда қонунчилик талабларига зид равишда 72 та объектларга 121 та реклама ўрнатилгани аниқланган.
Жумладан, Бухорода 27 та маданий мерос объектида — 50 та, Самарқандда 25 та объектда — 45 та, Тошкент шаҳрида 18 та объектда — 24 та, Хивада 2 та объектда —2 та реклама баннери ўрнатилган.
Хусусан, Бухоро шаҳрида жойлашган ноёб архитектура ёдгорлиги тоифасига кирувчи XIX асрга оид «Иброҳим Охунд» мадрасасида 6х3 ўлчамдаги «гўзаллик салони» реклама баннери ўрнатилиб, объектнинг тарихий кўриниши тўлиқ ёпиб қўйилган. Тошкент шаҳридаги ХХ асрга оид «Баҳор» ресторани биносида 7 х 9 ўлчамдаги «билярд ва ресторан» реклама баннери ўрнатилиб, бино тарихий кўриниши кўримсиз ҳолатга келтирилган.
Ўрганишлар давомида 53 та объектда ноқонуний ўрнатилган 99 та реклама баннерлари олиб ташланиши таъминланиб, маданий мерос объектлари кўриниши асл ҳолатига қайтарилган. Шунингдек, 19 та объектда ноқонуний ўрнатилган 22 та реклама баннерини олиб ташлаш юзасидан мутасадди шахсларга ёзма кўрсатмалар берилган.
Аввалроқ Самарқандда Афросиёб археологик объекти яқинида ковланган чуқурдан эски сопол буюм ва қабристон қолдиқлари топилгани, Туркия агентлиги Бухоро Аркидаги жоме масжидини тиклаш ва таъмирлаш ишларига маблағ ажратмоқчи экани, Маданий мерос объектларига етказилган катта зарар юзасидан Туризм вазирлигига тақдимнома киритилгани тўғрисида хабар берилганди.
Мавзуга доир:
- Ўзбекистон бўйича жами 108 та маданий мерос объектида 146 та ноқонуний қурилма қурилгани аниқланди
- Ўзбекистон музейларида қанча экспонат борлиги маълум қилинди
