Ҳинд океанида, Австралиянинг ғарбий қирғоқлари яқинида, 2014 йил март ойида Куала Лумпурдан Пекинга йўл олган Malaysia Airlines авиакомпаниясининг MH370 рейсини бажараётган Boeing 777-200 самолётини қидириш қайта бошланди. Бу ҳақда 9News хабар берди.
Маълумотларга кўра, қидирув ишларини Малайзия ҳукумати билан тузилган шартнома асосида АҚШнинг Ocean Infinity компанияси олиб бормоқда.
Янги қидирув операцияси тахминан 15 минг квадрат километр майдонни қамраб олиши кутилмоқда. У Австралиянинг ғарбий қирғоғидаги Перт шаҳридан тахминан 1,5 минг километр узоқликда амалга оширилади. Қидирувларни кичик ҳудудда олиб бориш уларни олдинги 200 минг квадрат километрли операцияларга нисбатан аниқроқ ва пухта ўтказиш имконини беради.
♦ Boeing 777-200 самолёти 2014 йил 8 март куни маҳаллий вақт билан соат 00:42 да Куала Лумпурдан Пекинга йўл олди. 40 дақиқадан сўнг экипаж сўнгги марта алоқага чиқди, 7 соатдан кейин эса лайнер радарлардан ғойиб бўлди. Самолётнинг бир нечта кичик парчалари топилди. Йўловчилар ва экипаж аъзоларининг жасадлари аниқланмади. 239 киши “бахтсиз ҳодиса оқибатида” ҳалок бўлган ҳисобланди.
Эҳтимол, самолёт Ҳинд океанининг жанубий қисмида ҳалокатга учраган. Қидирув операцияси самолёт ҳалокатга учраган жойни аниқлай олмаган.
2018 йил июль ойида Малайзия фуқаро авиацияси департаменти раҳбари Азҳаруддин Раҳмон 2014 йилда йўқолган Boeing ҳақидаги ҳисоботини тақдим этгач, истеъфога чиқди. Унинг айтишича, ҳисобот парвоз амалга оширилган Куала Лумпур авиадиспетчерлик хизмати фаолиятидаги қоидабузарликларни аниқлаган. Малайзия авиация маъмурлари жавобгарликка тортилмаган бўлса-да, Раҳмон ўз лавозимини тарк этишга қарор қилди.
2024 йилнинг март ойида Малайзия ҳукумати ғойиб бўлган Boeing лайнерини қидиришни қайта бошлашга тайёрлигини билдирганди. Ўша пайтда Австралия Малайзияга самолётни топишда ёрдам кўрсатишга тайёр эканини таъкидлаганди.
Изоҳ (0)