Малайзия расмийлари, агар янги далиллар пайдо бўлса, 10 йил аввал Куала-Лумпурдан Пекинга MH370 рейсида ғойиб бўлган Malaysia Airlines самолётига оид терговни қайта бошлашга тайёр. Бу ҳақда мамлакат бош вазири Анвар Иброҳим берган ахборотга таяниб, Reuters хабар берди.
Бизнингча, агар ишни қайта очиш кераклиги ҳақида янги ишончли далиллар пайдо бўлса, биз бундан, албатта, хурсанд бўламиз, — деди бош вазир Австралияда журналистларга.
Аввалроқ Малайзия транспорт вазири Энтони Локе Сиэу Фук департамент йўқолган самолётни қидиришни қайтадан бошлаш ниятида эканлигини маълум қилган. Унинг сўзларига кўра, бу мақсадда Американинг Ocean Infinity компанияси жалб этилиши мумкин.
Reuters’га кўра, Австралия, Хитой ва Малайзиянинг биргаликдаги самолёт қидируви 2017 йил январида ҳеч қандай натижа бермай якунланган.
Malaysia Airlines авиакомпаниясига тегишли Boeing 777-200 2014 йил 8 мартга ўтар кечаси Куала-Лумпурдан Пекинга учган ва тахминан икки соатдан кейин радарлардан ғойиб бўлган. Самолёт бортида 227 нафар йўловчи ва 12 нафар экипаж аъзоси бўлган. 2015 йил январида Малайзия расмийлари самолёт ҳалокатга учраганини ва бортдагиларнинг барчаси ҳалок бўлганини тан олган. Йўқолган самолётнинг излари ҳануз топилмаган.
Изоҳ (0)