Туркманистон томонидан яқинда сотиб олинган иккита кенг фюзеляжли Boeing 777-300ER —дунёдаги энг узоқ масофага учувчи йўловчи самолётларидан иккинчиси ҳам республикага етказилди.
Битим Туркманистон президентининг алоҳида фармони билан имзоланган. Биринчи самолёт декабрь ойида маҳаллий флотга қўшилди.
“Иккинчи замонавий самолёт 368 йўловчини ташишга қодир бўлиб, унинг самарадорлиги юқори ва қулай. Йўловчи ўринларидан 40 таси бизнес-класс, 32 таси премиум эконом-класс ва қолган 296 таси эконом-класс”, — дейилади Turkmenistan Airlines пресс-релизида.
Иккита GЕ90-115BL2 двигатели билан жиҳозланган самолёт 11 390 километр масофани босиб ўтади ва 40 тоннагача фойдали юк билан халқаро парвозларни амалга ошириши мумкин.
Туркманистонда ягона миллий авиаташувчи компания Turkmenistan Airlines 90 йиллардан бери Америка моделларини ишлатиб келмоқда.
Ушбу модификациядаги самолёт тўртта Boeing 777-200 (LR) самолётини ишлатаётган Turkmenistan Airlines паркидаги биринчи энг тез учоқ бўлади. Туркманистон президенти яна тўртта Boeing 737-8 самолётига буюртма беришни ҳам қўллаб-қувватлаган.
Туркманистон Россия ва Франция самолётларидан ҳам фойдаланади.
Эзиз Бояров
Изоҳ (0)