Маврикийда ғойиб бўлган MH370 рейси бўлаклари топилди

Малайзия ҳукумати апрель ойида Маврикий оролида топилган бўлаклар Malaysia Airlines авиакомпаниясининг MH370 рейси Boeing 777 самолётига тегишли эканлигини тасдиқлади, деб ёзади «Газета.ru» Reuters’га таяниб.

Австралия транспорт хавфсизлиги бошқармаси томонидан ўтказилган экспертиза маълумотларига кўра, топилган бўлаклар самолёт қаноти орқа қиррасининг бир қисмидир.

Олдинроқ ҳаво кемаси парчалари Танзаниядан ва Ҳинд океанидаги Реюньон оролидан топилганди. Шунингдек, Мозамбик ва Жанубий Африка республикаси ҳам топилмалар ҳақида маълум қилган.

Эслатиб ўтамиз, Куала-Лумпурдан Пекинга йўл олган, бортида 227 нафар йўловчи ва 12 нафар экипаж аъзоси бўлган Boeing 777-200 2014 йил 8 мартга ўтар кечаси радарлардан ғойиб бўлганди.