Ташқи меҳнат миграцияси агентлиги ўзбекистонликлар Германияга ишга таклиф қилинаётганини эълон қилди.
Хабарда айтилишича, маош соатига 12,8 евродан. Иш эса ҳафтада 5 кун 8 соатдан. Номзодлар учун талаблар:
- камида 2 йиллик касб-ҳунар таълими дипломи;
- камида 2 йиллик иш тажрибаси;
- 20-40 ёш оралиғи;
- судланмаган ва жисмонан соғлом.
Дастурда иштирок этиш мумкин бўлган касблар:
- Электроникачи – электротехника ва бино-иншоотлар техникаси
Электротехника ва бино-иншоотлар техникаси мутахассислигининг электроникачилари бино ва иншоотларнинг техник қурилмаларини, шу жумладан электр таъминот, ёритиш, совитиш, кондиционер ва кузатув ускуналарини режалаштиришади ва ўрнатишади. Кир ювиш машиналарини, газ плиталарини электр тармоғига улашади, бино(лар)ни бошқариш тизим(лар)и ва ахборот узатиш тармоқларини режалаштиришади ва ўрнатишади, иситиш, вентиляция ва кондиционер тизимларининг назорат ва бошқарув ускуналарини дастурлашади ва созлашади. Бундан ташқари, улар антенна, қабул қилиш ва кенг тасмали (полосали) алоқа ускуналарини ўрнатишади. Техник хизмат кўрсатиш ишлари доирасида улар бино-иншоотларнинг техник тизимларини текширишади ва, зарур бўлса бошқатдан созлашади. Носозликлар бўлса, улар носозлик сабабларини аниқлашади ва ускуна-тизимларни таъмирлайди.
- Сантехника, иситиш ва кондиционерлар бўйича механик
Сантехника, иситиш ва кондиционерлар бўйича механиклар сув ва ҳаво таъминоти тизимларини ўрнатишади, раковиналарни, душ кабинкалари, туалетлар ва бошқа санитария иншоотларини ўрнатишади ва тегишли тармоққа улашади. Шу жумладан барқарор таъминот ва чиқиндиларни бартараф этиш тизимлари сифатида улар ёмғир суви ва техник сувдан фойдаланиш тизимларини ўрнатишади. Бундан ташқари улар иситиш тизимларини монтаж қилишади, иситиш қозонларини ўрнатишади ва ишга туширишади. Ўз фаолиятида улар металл ва пластик қувурларга, тунука ва профилларга тегишли ускуналар ёрдамида ёки қўл билан ишлов беришади.
Қолаверса, улар кам энергия сарфлайдиган ва атроф-муҳитни асрайдиган тизимларни, шу жумладан қуёш электр тизимларини, иссиқлик насослари ва ёғоч пеллетли тизимларни биноларда монтаж қилишади. Монтаждан сўнг улар ускуналар ва тизимлар бенуқсон ишлаётганлигини ва оптимал созланганлигини текширишади. Улар бино(лар)ни бошқариш тизимларини, масалан Ақлли уй тизимларини ўрнатишади ва тегишли дастурий таъминотни, масалан иловаларни қўллашади. Улар мижозга маслаҳатлар беришади, мисол учун тармоқ таркибида бир-бири билан уланган тизим техникаси бўйича маслаҳатлар, ва мижозга ускуна ва тизимлардан қандай фойдаланишни тушунтириб беришади.
- Мехатроника - совитиш техникаси
совитиш техникаси бўйича мехатроникачилар совитиш ва кондиционер тизимлари учун тегишли компонентларни йиғишади ва тизимнинг бутловчи қисмларини устахонада олдиндан монтаж қилишади. Булар қаторига, масалан, механик, электроник ва электротехник компонентлар киради. Мижозникида улар бу тизимларни ўрнатишади, қувурларни ётқизишади, уларни изоляция материаллари билан қоплашади, электр уланиш нуқталарини ўрнатишади ҳамда назорат ва бошқарув ускуналарини дастурлашади. Монтаждан сўнг совитиш техникаси бўйича мехатроникачилар ускуналар ва тизимлар бенуқсон ва хавфсиз ишлаётганлигини текширишади, уларни ишга туширишади ва мижозга ускуналарни ва улардан қандай фойдаланишни тушунтириб беришади. Бундан ташқари улар бу тизимларнинг техник хизматини кўрсатишади.
- Чилангар – қурилиш технологияси
Қурилиш технологияси мутахассислиги бўйича чилангарлар пўлат ёки бошқа металлардан ясалган навеслар, фасад элементлари, дарвозалар, ойна ромлари ёки панжараларни ишлаб чиқаришади ва ўрнатишади. Кўп ҳолатларда улар мижознинг хоҳишига асосан индивидуал маҳсулот ишлаб чиқаришади. Улар енгил металлар ёки пўлатга қўл билан ёки ускуналар ёрдамида ишлов берганларида, техник чизмаларга асосланиб ишлашади. Улар металл тунукаларни, қувурлар ёки профилларни махсус белгилаб, уларни кесишади ва шакллантиришади. Сўнг улар алоҳида қисмларни пайвандлашади, заклёпка қилишади ёки бир бирига шуруп-болтлар билан қотиришади. Бундан ташқари улар жойида монтаж вақтида очиб-ёпиш ва хавфсизлик ускуналари қуриб ўрнатишади, масалан механик, гидравлик ва электрик дарвоза ёки қуёшдан ҳимоя қилиш тизимлари учун моторлар. Қолаверса, улар ўз маҳсулотларининг техник хизматларини қилишади ва уларни соз ҳолатда сақлашади.
- Бино-иншоотлар қурувчиси – девор қурувчи
Девор қуриш йўналиши бўйича бино-иншоотлар қурувчилари деворлар, зинапоялар ёки шахталар каби девор қурилиш ишларини қилишади. Бунинг учун улар қоришма (раствор) тайёрлашади ва девор қисмлари бўлмиш клинкер, пишган ғишт ёки қум оҳакли ғиштларни бир-бирининг устига қўйиб ўрнатади. Улар шифт ва деворларни бетонлашади, ойна перемичкалари ёки зиналар каби тайёр қисмларни монтаж қилишади ва стяжка қилишади. Бундан ташқари улар иссиқлик, совуқлик, шовқин ва ёнғиндан ҳимоя қиладиган изоляция материалларини монтаж қилишади, деворлар ва шифтларни сувашади, масалан гипсокартондан деворлар қуришади. Улар янги бино-иншоотларни қуришда ёки эскиларини таъмирлашда ишлашлари мумкин.
- Бино-иншоотлар қурувчиси - бетон ва темир-бетон ишлари
Бетон ва темир-бетон ишлари бўйича бино-иншоотлар қурувчилари пойдевор, устунлар, ригеллар, деворлар ва шифтлар каби компонентларни қуришади. Бунинг учун керак бўлган қолипларни (опалубкалар) ва арматуралаш ишларини, яъни бетон дарс кетишини олдини олишга қаратилган ишларни ҳам ўзлари қилишади. Улар бетон қоришмасини тайёрлашади, уни суюқ шаклда қолипларга қуйишади ва зичлашади. Бетон қотганидан кейин улар қолипларни олиб қўйишади ва зарур бўлса, бетон сиртидаги нуқсонларни бартараф этишади. Бундан ташқари улар тайёр бетон қисмларини ўрнатишади ва иссиқлик, совуқлик, шовқин ва ёнғиндан ҳимоя қиладиган изоляция материалларини монтаж қилишади. Улар янги бино-иншоотларни қуришда ёки эскиларини таъмирлашда ишлашлари мумкин.
- Девор қурувчиси
Девор қурувчилар турар жой ва нотурар жой учун мўлжалланган биноларнинг коробкасини (хом ҳолатини) қуришади. Улар аввал бетондан пойдевор (фундамент) қуйишади, кейин ташқи ва ички деворларни ғиштдан теришади ёки бетондан қуйишади ёки тайёр қисмлардан монтаж қилишади. Бетон ишлари учун улар қолиплар (опалубка) ясашади ёки тайёр қолип тизимларини ўрнатишади. Улар арматуралаш ишларини бетон учун мўлжалланган темирдан (арматурадан) қисман ўзлари қилишади. Улар бетон тайёрлашади ёки бетон юк машинасида тайёр ҳолатда келтирилган бетонни ишлатишади. Суюқ бетонни улар қолипларга солишади ва зичлашади.
Улар қисман деворларни ҳам сувашади, стяжка ётқизишади ёки изоляция материалларини монтаж қилишади. Бундан ташқари улар бузиш ва қайта қуриш ишларини бажаришади. Таъмирлаш ва санация ишлари доирасида улар структуравий шикастларни ва уларнинг сабабларини аниқлашади ва уларни бартараф этишади.
- Бетончи ва темир-бетончи
Бетончи ва темир-бетончилар бетон ва темир-бетон қурилмаларни, масалан кўприклар, цехлар ва кўп қаватли бинолар учун қурилмаларни қуришади. Улар қолиплар (опалубка) ва ҳавозаларни монтаж қилишади ва тайёрлашади, бетон дарз кетишининг олдини олишга мўлжалланган арматураларни букишади ва бир-бири билан боғлашади, арматураларни қолипларга ўрнатишади.
Улар бетон қоришмаларини тайёрлашади ёки бетон юк машинасида тайёр келтирилган бетонни ишлатишади. Суюқ бетонни улар қолипларга солишади ҳамда трамбовка қилиб ва силкитиб зичлашади. Бетон қотганидан кейин қолипларни олиб қўйишади ва зарур бўлса, бетон сиртидаги нуқсонларни бартараф этишади. Улар бетондан ясалган тайёр қисмларни монтаж қилишади, бетон қурилмаларини герметизация ва изоляция қилишади. Бундан ташқари бетондан ясалган компонентларнинг шикастланган жойларини таъмирлашади.
- Пардозчи – дурадгорлик ишлари
Дурадгорлик ишлари бўйича пардозчилар ёғоч конструкцияларни, мисол учун шифтлар, чердаклар, синч ва ёғоч каркасли қурилмалар учун ясашади. Улар ёғоч балкалар ва тахталарни арралаш ва рандалаш ускуналари билан, қисман қўлда ишлов беришади. Қурилиш майдончасида улар тайёрлаб қўйилган қисмларни монтаж қилишади, эшиклар, дарвозалар ва ёғоч зиналарни ўрнатишади, деворларга қопламалар (обшивка) ўрнатишади, гипсокартондан компонентлар ва уларнинг каркасларини ясашади, ёғочли сиртларга ишлов беришади ва керак бўлса, иссиқлик, шовқин ва ёнғиндан ҳимоя қиладиган изоляция материалларини ўрнатишади. Бундан ташқари улар ўлчовлар ўтказишади - масалан, стропилаларнинг бурчаги ва оғишини текшириш мақсадида ва зарур бўлса, камчиликларни тўғрилаш учун керакли ишларини қилишади. Улар янги бино-иншоотларни қуришда ёки эскиларини таъмирлашда ишлашлари мумкин.
- Том ёпувчи
Том ёпувчилар том каркаси учун ёғоч конструкцияларни ясашади ҳамда том ва том деворининг майдонини профнастил, керамик черепица, тошли черепица, шиндел (том дранкаси) ёки бошқа қоплама материаллар билан ёпишади ва қоплашади. Улар том ва девор майдонлари, балконлар ва терассалар ҳамда қурилмаларда гидроизоляция ишларини амалга оширишади, ташқи деворларни қопламалар билан қоплаш учун каркас ясашади, қопламаларни монтаж қилишади ва бинонинг ташқи деворларига осма фасад қоплама билан шакл (дизайн) беришади.
Қолаверса улар чақмоқдан ҳимоя қилувчи қурилмалар, қорни ушлаб қолиш тизимлари, тарновлар, тик қувурлар (стояклар), том деразалари ёки ёруғлик гумбазларини монтаж қилишади ва қуёшли иситиш ва электр ускуналарини, шу жумладан электрик компонентлар ва уланиш нуқталарни томларда ва фасадларда ўрнатишади.
Бундан ташқари улар бино эгалари ва мулкдорларига бинони энергетик санация қилишда кўмак беришади ва тегишли чораларни ўтказишади, масалан изоляция қатламларини ва буғни изоляция қилиш элементларини ўрнатиш. Қолаверса томларни яшиллаштириш ҳамда том ва девор майдонлари ҳамда уларнинг таркибий қисмларининг техник хизмати ва соз ҳолатда сақланиши том ёпувчиларнинг вазифалари қаторига кириши мумкин.
- Йўл қурувчиси
Йўл қурувчилари асосий ва қўшимча йўлларни, пиёдалар ва велосипедлар учун йўлларни, пиёдалар зоналарини ҳамда автомагистраллар ва аэродромларни қуришади. Қурилиш майдони чегаралари белгиланиб тўсиб олинганидан кейин улар ер қазиш ишларини бошлашади. Улар тупроқни олишади, транспортда ташишади, текислашади ва зичлаштиришади. Бунда улар экскаваторлар, занжирли экскаваторлар ва катоклардан фойдаланишади. Зичлаштирилган грунтга улар пастки қатлам сифатида одатда бир қатор майда тош (шебен) ва бошқа тошлар аралашмаларини йўйишади. Охирида бетон-асфалт қопламаси йўлнинг қатнов қисми сифатида ётқизилади. Бундан ташқари йўл қурувчилари брусчатка ётқизиш ишларини қилишади ва йўл четларини мустаҳкамлашади, қияликларни ҳамда дренаж ариқларини қуришади. Янги биноларни қуришдан ташқари, улар йўллар ва кўчаларни таъмирлаш ва сақлаш ишларини ҳам бажаришади.
- Автомехатроника – енгил автомобиль техникаси
Енгил автомобиль техникаси бўйича автомехатроникачилар автомобилларнинг механик, электроник, гидравлик ва пневматик тизимларни ёки ускуналарни соз ҳолатда сақлашади. Электроник ёки компьютерли ўлчов ва диагностика ускуналари ёрдамида улар мисол учун узатма агрегатлари, радиаторлар, даражани бошқариш тизимлари ва ҳайдовчига ёрдам берувчи тизимларни текширишади ва таҳлил қилишади. Улар қисмларни мойлайди, носоз қисмларни алмаштиришади, узатма тизимининг қисмларини таъмирлашади ёки мойлаш материаллари, тормоз ёки гидравлика суюқликларини алмаштиришади. Қолаверса улар йўл ҳаракат қоидаларининг талаблари бажарилишини назорат қилишади, тест-драйвлар (автомобилни синов тариқасида миниб кўриш) ўтказишади ва ишлаб чиқарилган газларни ўлчашади. Мижознинг хоҳишига биноан улар навигация қурилмалари ёки қўллар ишлатилмайдиган алоқа ускуналари каби қўшимча қурилмаларни ўрнатишади. Бундан ташқари автомехатроникачилар электромобиллар соҳасида ҳам ишлаши мумкин.
Ўзбекистонликлар учун Германияга миграция масаласида бир қатор енгилликлар ишлаб чиқилмоқда. Германияда транспорт, муҳандислик соҳаларида ишлаш истагида бўлган фуқаролар ушбу давлат стандартлари асосида Камбағалликни қисқартириш ва бандлик ҳамда Транспорт вазирликлари қошидаги касбий таълим муассасаларида германиялик мутахассислар томонидан тил ва касбга ўргатилади.
Изоҳ (1)
Qanday borsa boladi?