Жиззах вилоятидаги “Жиззах индустриал тўқима” МЧЖ пахта тўқимачилик кластери томонидан пахта толаси ва техник чигит маҳсулотларини тўғридан тўғри шартномалар асосида сотилганлиги аниқланди. Бу ҳақда Рақобат қўмитаси хабар бермоқда.
Айтилишича, кластер 321,7 тонна пахта толасини биржа котировка нархларига нисбатан юқори нархларда ва 1021 тонна пахта толасини биржа котировка нархларига нисбатан паст нархларда сотган. Шунингдек, 2536 тонна техник чигит маҳсулоти биржа котировка нархлари билан солиштирилганда паст нархларда сотилганлиги маълум бўлган.
Қонунчиликка мувофиқ, “Жиззах индустриал тўқима” МЧЖга нисбатан иш қўзғатилиб, натижаси юзасидан белгиланган тартибда тегишли таъсир чораси қўлланилган.
Ўрганишлар вақтида пахта шроти бўйича биржа савдоларида иштирок этган “Пахтакор сифат ёғ”, “Жиззах кентекс” ва “Бахмал қуёш нури” жамиятлар томонидан нархларни келишган ҳолда кескин оширганлик аломатлари мавжудлиги аниқланган. Уларга нисбатан Махсус комиссия томонидан иш қўзғатилиб, жамиятларнинг мансабдор шахсларига нисбатан маъмурий баённомалар расмийлаштирилди.
Изоҳ (0)