Рақобат қўмитаси товар-хом ашё биржасида Аи-80 автомобиль бензини нархининг юқори чегарасини белгилади, деб хабар бермоқда “Spot”.
Қайд этилишича, қўмитанинг 12 ноябрдаги топшириғига кўра, чоршанба кунидан бошлаб Аи-80 бензини нархининг сотувчининг бошланғич нархига нисбатан 5 фоиз миқдорида ўсишига чеклов жорий этилди. Бундан ташқари, битта қўлга 4 тонна бензин сотиш чеклови ҳам сақлаб қолинади.
Шундай қилиб, Бухоро нефтни қайта ишлаш заводи ишлаб чиқарган бензиннинг дастлабки нархи бир тоннаси учун 8 931 005 сўмни ташкил этса, жорий этилган чекловни ҳисобга олган ҳолда бир тонна бензиннинг энг юқори нархи 9 377 555,25 сўмга тенг бўлади.
Ноябрь ойида Аи-80 бензинининг биржа нархи бир тонна учун 10 миллион сўмдан ошиб кетди. Бир йил аввал Аи-80 бензиннинг тоннаси ўртача 7 миллион 228 минг сўмдан сотилган.
Бундан аввал қўмитаннинг 5 ноябрдаги топшириғига кўра суюлтирилган газ нархининг ошишига сотувчининг бошланғич нархига нисбатан 20 фоиз миқдорида чеклов (спред) жорий этилганди. Нархларнинг кескин пасайишига қарамай, биржадаги пропан таклифи деярли икки баравар камайди — 2 минг тоннадан 1 минг тоннагача.
Изоҳ (0)