Тошкент шаҳар ҳокимлиги пойтахт кўчаларида пулли тўхташ жойларини бошқариш ҳуқуқи учун аукцион ўтказиши ҳақида хабар берилган эди. Аукцион якунига кўра, 120 миллиард сўм таклиф билан Balcomuz МЧЖ қўшма корхонаси ғолиб бўлди.
Бошланғич нарх 57 миллиард сўмни ташкил этганди. Аукцион пойтахтда жами 86 та пулли парковка участкасини ижарага бериш бўйича ўтказилди.
Иқтисодчи Отабек Бакиров Тошкентдаги 50 дан ортиқ энг гавжум ва ликвидли кўчалар битта лотда савдога чиқарилишини танқид қилганди. “Агарда аукцион пойтахт маъмурияти истагандек ўца, шаҳарда ягона парковка қироли пайдо бўлади. Ғолиби олдиндан ёпиқ кабинетларда келишилмаган бўлмаса, бу жараённи аукцион дейишга тил бормайди” деган эди иқтисодчи.
“Рақобат қўмитаси ва Антикоррупция агентлиги пойтахтда парковка монополиясини яратиши мумкин бўлган, белгиларига кўра аукцион деб аташ қийин бўлган аукционни тўхтатмаган. Балки ҳаракат қилишгандир, билмадим”, деб ёзди Отабек Бакиров аукцион якунлари эълон қилингач.
Иқтисодчи аукционнинг захира ғолиби номи кўрсатилмаганига эътибор қаратди (ғолиб шартларни бажара олмаса, ғолиблик кейинги энг кўп нарх таклиф этган талабгорга ўтади).
“Ғолибга кўп саволлар йўқ, саволлар ҳаммаси рақобатли бўлмаган аукцион ташкилотчиларига. Бу якка лотни ўнлаб лотларга ажратиш ва талабгорлар кўпайтириш ҳисобига, ҳуқуқларни 120 миллиард сўм эмас, балки 500 миллиард сўмга сотиш мумкин бўларди. Бозорда ўзаро рақобатлашувчи бир неча компаниялар шаклланарди, давлат ютарди, истеъмолчи ютарди. Ҳозир ютган бўлса, кабинетда ўтирган чиновник ёки қанақадир ютди, холос. Қолган ҳамма ютқизди”, дейди у.
Отабек Бакиров буни Тошкент учун, Ўзбекистон учун навбатдаги мағлубият деб атади. “Бундан ҳам баттар бўламиз бу кетишда”, деб таъкидлади у.
Ғолиб компания ҳақида
Balcomuz МЧЖнинг 60 фоиз улуши Balcom Cо.Ltd (Япония) компаниясига, 20 фоизи Нуриддинов Авазбек Шокиржон ўғлига, 10 фоизи Акрамов Бобур Ахатовичга ҳамда қолгани (10 фоиз) Ҳошимов Анвар Олим ўғлига тегишли. Компания сайтида айтилишича, улар ресторан (Фламинго), IT, қурилиш, консалтинг ва кўнгилочар хизматлар (Central Park) бозорида фаолият юритади.
Тошкентда пулли тўхташ жойлари
Тошкентда автомобиллар учун йўл бўйларида пулли тўхташ жойлари ташкил этилиши ҳақида 2021 йилда маълум бўлганди. Ўшанда “Тошкент шаҳар транспорти ва йўл-транспорт инфратузилмасини 2025 йилгача ривожлантириш концепциясини тасдиқлаш тўғрисида”ги Вазирлар Маҳкамаси қарори лойиҳасида пойтахтдаги тирбандликларни, марказий кўчаларда транспорт оқимини камайтириш, автомобилларнинг йўл бўйида бетартиб тўхташини тартибга солиш мақсадида ягона автомобиль йўл бўйи пулли тўхташ жойлари тизимини ташкил этиш зарурлиги айтилганди.
Дастлаб 10 та марказий кўчада пулли автомобиль тўхташ жойлари тармоғи пайдо бўлиши эълон қилинди.
Президентнинг 2022 йил 2 февралдаги қарорига мувофиқ, 2022 йилда 10 та марказий кўчаларда, яъни Глинка, Братислава, Миробод, Авлиё ота, Тарас Шевченко, Саид Барака, Моштабиб, Фидокор, Содиқ Азимов ва Якуб Колас кўчаларида давлат-хусусий шериклик асосида автомобилларнинг автоматлаштирилган йўл бўйи пулли тўхташ жойларини ташкил этиш белгиланди.
2024 йил 16 октябрь куни Шавкат Умурзоқов Тошкент шаҳрида транспорт воситаларининг пулли тўхтаб туриш фаолиятини янада такомиллаштириш чора-тадбирлари тўғрисидаги қарорни имзолади. Ҳужжатда пулли тўхтаб туриш жойларидан фойдаланганлик учун тўловлар миқдори ҳам тасдиқланди. Паркинг ҳудудлари 5 та тариф зонасига бўлинади.
Бир соатлик тўхтаб туриш нархлари:
- 1-тариф зонасида 12 минг сўм;
- 2-тариф зонасида 10 минг сўм;
- 3-зонада 8 минг сўм;
- 4-зонада 6 минг сўм;
- 5-тариф зонасида 5 минг сўмни ташкил қилади.
Паркинг транспорт воситаларини сақлаш учун мўлжалланмаган. У ерда учинчи шахслар томонидан транспорт воситаларининг олиб қочилиши ва шикастланиши хавфи автомобиллар эгалари зиммасида қолади.
2024 йил 19 январда “Йўл ҳаракати тўғрисида”ги қонун президент томонидан имзоланганди. Қонунда пулли тўхтаб туриш жойларининг эгалари ушбу жойлардан фойдаланганлик учун тўлов миқдорини Қорақалпоғистон Вазирлар Кенгаши, вилоятлар ва Тошкент шаҳар ҳокимликлари томонидан Иқтисодиёт ва молия вазирлиги билан келишилган ҳолда белгиланадиган чекланган миқдорлардан юқори бўлмаган тарифлар бўйича мустақил равишда белгилаши қайд этилган.
Изоҳ (0)