Ўзбекистонда кўп квартирали уйни бошқарувчи ташкилотлар фаолияти ўрганилганда шартномаларда қонундан ташқари асоссиз шартлар белгиланганлиги аниқланди, деб хабар бермоқда Рақобат қўмитаси матбуот хизмати.
Қайд этилишича, қўмитага ва унинг ҳудудий тузилмаларига фуқаролардан бошқарув сервис компаниялари (БСК) ва улар томонидан кўрсатилаётган хизматлардан норозилик билдирилган кўплаб мурожаатлар келиб тушмоқда.
Хусусан, 2024 йилнинг январь октябрь ойларида қўмитага уй-жой коммунал хизмат кўрсатиш, қурилиш ва транспорт соҳасида истеъмолчилардан жами 8434 та мурожаат келиб тушган бўлса, булардан 380 таси кўп квартирали уйларни бошқариш соҳасига тўғри келади.
Мурожаатлар ўрганилганда бошқарув органлари томонидан мулкдорларнинг умумий йиғилишларни ўтказилмаслиги, амалга оширилган ишлар юзасидан ҳисоботлар очиқ тақдим этилмаслиги ва ҳисоботлар билан танишиш учун онлайн имкониятларнинг мавжуд эмаслиги шунингдек, кўрсатилмаган хизматлар учун асоссиз қарздорликлар ҳисобланаётгани маълум бўлган.
Ўрганишлар жараёнида шартномаларда белгиланган қонунчилик нормаларига мос келмайдиган ёки истеъмолчининг ҳуқуқини чеклаб қўювчи бир нечта шартларни киритган қатор БСКлар аниқланган.
Хусусан, Қашқадарё вилояти, Қарши шаҳрида “Лочин-Санжар БК” МЧЖнинг шартнома шартларида мажбурий бадалларни тўлашда муддатдан кечиктирганлик учун 0,1 фоиз миқдорида жарима қўлланиши, бироқ компания ўз мажбуриятларини муддатида бажармаганлик учун ҳеч қандай жавобгарлик белгиланмаган.
Бундай ҳолатлар Тошкент вилоятининг Ascent Gold Story МЧЖ, Қашқадарё вилояти “Омад пахтазор коммунал ПБК” МЧЖ, Сирдарё вилоятида “Истиқлол коммунал хизмат таъмир” МЧЖ, Самарқанд вилоятида “Нурафшон ташаббуси” МЧЖ ва “Афросиёб Мароқанд БСК” МЧЖ ва “Паст Дарғом коммуналчи” МЧЖларида ҳам кузатилган.
Фарғона вилоятида фаолият юритувчи “Хумо Турон” МЧЖ шартномасида эса 3 ой мобайнида тўлов амалга оширилмаган тақдирда электр энергияси, газ ва сув таъминотидан узиб қўйилиши қайд этилган. Амалдаги қонунчиликка асосан БСКларга коммунал таъминотлардан узиб қўйиш ваколати берилмаган.
Тошкент вилояти, Олмалиқ шаҳрида яшовчи фуқаронинг Ascent Gold Story МЧЖ бошқарув сервис компанияси ўртасида тузилган умумий мол-мулкни сақлаш, ундан фойдаланиш ва уни таъмирлаш бўйича тузилган шартномада БСК ўз мажбуриятларини бажармаганда ёки лозим даражада бажарилмаганлик натижасида етказилган зарар давлат томонидан қоплаб берилиши тўғрисида асосланмаган шарт белгиланган.
Шунингдек, “Кўп квартирали уйларни бошқариш тўғрисида”ги қонун 28-моддасининг 11-хатбошида белгиланган агар бошқарувчи ташкилот ёки бошқарувчи шартнома шартларини бажармаса, кўп квартирали уйдаги жойларнинг мулкдорлари умумий йиғилиш қарорига асосан кўп квартирали уйни бошқариш шартномасини бажаришдан бир томонлама тартибда воз кечишга ва бошқа бошқарувчи ташкилотни ёки бошқарувчини танлаш тўғрисида қарор қабул қилиши асосий ҳуқуқларидан бири бўлиб, лекин шартноманинг томонларнинг мажбуриятлари ва ҳуқуқлари тўғрисидаги бўлимида мулкдорнинг ҳеч қандай ҳуқуқи акс эттирилмаган.
Хабарда айтилишича, юқоридаги муаммолар ечими бўйича Рақобат қўмитаси томонидан Қурилиш ва уй-жой коммунал хўжалиги соҳасида назорат қилиш инспекциясига тегишли таклифлар билан маълумот юборилди.
Ўзбекистонда кўп қаватли уйларга хизмат кўрсатувчи бошқарув органлари томонидан пулларнинг мақсадсиз сарфланиши ҳолатлари ҳам кузатилган. Аниқланган қонунбузилиш ҳолатлари юзасидан тўпланган ҳужжатлар ҳуқуқни муҳофаза қилувчи органларга юборилган.
Статистика агенлиги маълумотига кўра, 2024 йилнинг 1 январида Ўзбекистонда кўп квартирали уйлардаги хонадонлар ва якка тартибдаги уйлар сони қарийб 7,5 миллионтани ташкил этган.
Изоҳ (0)