Самарқанд шаҳрида Токиода бўлиб ўтган ХХХII ёзги Олимпия ва XVI Паралимпия ўйинларининг самарқандлик совриндор ва иштирокчиларини тақдирлаш маросими бўлиб ўтди. Унда вилоят ҳокими Эркинжон Турдимов қатнашиб, барча Олимпиячиларни эришилган муваффақият билан қутлади.
Паралимпия чемпиони Ҳусниддин Норбековга Самарқанд шаҳридан уч хонали уй, Паралимпия ўйинлари кумуш медал соҳиби Парвина Самандарова ва дзюдо бўйича Олимпия ўйинлари бронза медали эгаси Давлат Бобоновга икки хонали уй калити топширилди.
Шунингдек, Олимпия ўйинларида қатнашиш учун лицензияни қўлга киритган спортчиларга Самарқанд шаҳридан бошланғич тўлови тўланган икки хонали уй ҳамда уларнинг мураббийларига 25 миллион сўмдан пул мукофоти берилди.
Таъкидлаш жоиз, Самарқанддан Олимпиада ўйинларида 10 нафар, Паралимпия ўйинларида эса 4 нафар спортчи иштирок этиди.
Аввалроқ Паралимпия ўйинлари совриндорлари бўлган ўзбекистонлик спортчиларга Президент совғаси сифатида автомобиль ва Тошкент шаҳридан уйлар топширилганди, Андижон вилояти ҳокими Паралимпия ўйинлари олтин медали совриндори Бобур Омоновга Андижон шаҳридан 2-хонали хонадон совға қилган, Қашқадарё вилоятида эса Паралимпия ўйинларида вилоят шаънини ҳимоя қилган Олимпиаданинг кумуш медали совриндорлари — Асила Мирзаёрова ҳамда Довурхон Караматовларга Президент совғаси — Gentra автомобиллари топширилганди.
Изоҳ (0)