Арманистон бош вазири Никол Пашинян коронавирусга тест натижаси ижобий бўлгани сабабли Санкт-Петербургда бўлиб ўтадиган МДҲ давлатларининг норасмий саммитида иштирок этмайди. Бу ҳақда сиёсатчининг ўзи маълум қилди.
Арманистон ҳукумати раҳбарининг Евросиё иқтисодий кенгаши йиғилишида иштироки бўйича ҳали қарор қабул қилинмаган.
“23 декабрь душанба куни менда COVID учун тест натижаси ижобий чиқди. 23 ва 24 декабрь кунлари ўзимни изоляция қилиб, яшаш жойимда ишладим. 25 декабрь куни тест натижам салбий бўлди ва мен одатдаги иш фаолиятимга қайтдим. Бироқ, ҳамкасбларим билан маслаҳатлашганимдан сўнг, МДҲ давлатлари раҳбарларининг норасмий саммитида иштирок этмасликка қарор қилдим”, деган Пашинян ўзининг Facebook саҳифасида.
25 декабрь куни Россия президенти Владимир Путин Санкт-Петербургда МДҲ етакчиларининг янги йил арафасидаги норасмий саммитини ўтказади. Учрашувда Россиянинг МДҲдаги раислиги якунланади. Бир йилга раислик Тожикистонга ўтади. Тадбирнинг расмий қисми якунлангач, давлат раҳбарлари ўртасида норасмий мулоқот режалаштирилган.
26 декабрь куни “Игора”да Евросиё иқтисодий кенгашининг йиғилиши бўлиб ўтади, унда ЕОИИ доирасида интеграцияни чуқурлаштириш масалалари муҳокама қилинади. Тадбирда Қозоғистон, Беларусь, Қирғизистон ва Ўзбекистон президентлари, шунингдек, Куба вакиллари иштирок этади. Умумий газ ва нефть бозорини яратиш, шунингдек, 2025 йилга мўлжалланган режалар, шу жумладан Эронга ЕОИИда кузатувчи давлат мақомини бериш масалалари муҳим мавзулар бўлади.
Президент Шавкат Мирзиёев 25 декабрь куни амалий ташриф билан Санкт-Петербургга етиб борди. “Пулково” халқаро аэропортида президентни Санкт-Петербург губернатори Александр Беглов ва бошқа расмий шахслар кутиб олди.
Барча тадбирлар Ленинград вилоятидаги “Игора” тоғ чанғи курортида бўлиб ўтади.
Изоҳ (0)