Исроил бош вазири Биньямин Нетаньяху агар ҲАМАС раҳбарлари ҳокимиятдан воз кечиб, “сургун”га рози бўлса, Ғазодаги урушни тўхтатишга тайёрлигини билдирди. Бу ҳақда манбаларга таяниб, Axios хабар берди.
Манбаларга кўра, Нетаньяху ўз режасини Вашингтонга сафари давомида тақдим этган. Исроил бош вазири гаровдагиларнинг кўпини озод қилиш учун ҲАМАС билан келишувнинг биринчи босқичини узайтирмоқчи. Ҳозирда 33 кишини озод қилиш режалаштирилган. Бунинг эвазига Исроил янада кўпроқ фаластинлик маҳбусларни озод қилишга тайёр, аммо уларнинг аниқ сони келтирилмаган.
Америка расмийлари таъкидлашича, Нетаньяху келишувнинг биринчи босқичини узайтирса, иккинчи босқич бўйича музокаралар чоғида ҲАМАСга таклиф бериши мумкин. У Ғазодаги урушни тўхтатиш ва “юқори мартабали” фаластинлик маҳбусларни озод қилишни ўз ичига олиши мумкин.
Исроил бунинг эвазига ҲАМАСдан гаровга олинганларни озод қилишни ва Ғазодаги ҳокимиятдан воз кечишни талаб қилади. ҲАМАС раҳбарлари, жумладан, озодликка чиқадиганлари ҳам “учинчи мамлакатга” сургун қилинади”, дейди манбалар.
Исроилнинг юқори мартабали амалдорлари ҲАМАС Ғазо устидан “фуқаролик назоратидан” воз кечишга ва Фаластин маъмуриятини тиклаш учун масъулиятни мустақил қўмитага топширишга рози бўлганини даъво қилмоқда.
Бироқ Фаластин ҳаракати тарқатиб юборилишга тайёр эмас.
Изоҳ (0)