Фирибгарлик учун 2023 йилдан бери қидирувда бўлган яна бир Ўзбекистон фуқароси Туркияда ушланди.
Истанбулдаги Бош консулхонаси берган маълумотга кўра, у 1991 йилда туғилган Аҳмадхон Ибрагимов бўлиб, фирибгарлик жиноятларини содир этиб, фуқароларга катта миқдорда зарар етказганликда айбланмоқда. Ушбу фуқаро Туркия ва Ўзбекистон Республикаси Ички ишлар вазирликлари ҳамкорлигида ўтказилган тезкор тадбир давомида қўлга олинди ва Тошкент шаҳрига депортация қилинди.
Ушбу шахснинг хатти-ҳаракатларидан жабрланган фуқаролардан Ўзбекистоннинг Истанбул шаҳридаги Бош консулхонасига ёки Ўзбекистон Ички ишлар вазирлигига, шунингдек, ички ишлар органларининг ҳудудий бўлинмаларига мурожаат қилиш сўралди.
Бундан аввал автомобиль олди-сотди соҳасида кўплаб фирибгарлик жиноятларини содир этганликда айбланиб 2015 йилдан буён қидирувда бўлган ўзбекистонлик эркак Туркияда ушланганди. Одам савдоси жиноятини содир этганликда айбланиб, Ўзбекистон Ички ишлар вазирлиги томонидан қидирувда бўлган аёл Тошкент шаҳрига депортация қилинганди.
Жиноят учун жазонинг муқаррарлигини таъминлаш мақсадида Туркия ҳудудида ҳамкорликдаги тадбирлар тизимли равишда давом эттирилмоқда.
Изоҳ (0)