Оғрилик жиноятини содир этганликда айбланиб 4 йилдан буён қидирувда бўлган ўзбекистонлик аёл Туркияда ушланди.
Ўзбекистоннинг Истанбулдаги Бош консулхонаси берган маълумотга кўра, у 1998 йилда туғилган Эркинова Гулруххон Акмалжон қизи бўлиб, 2020 йилдан буён қидирувда бўлган ушбу аёл Туркия ва Ўзбекистон ИИВ ҳамкорлигида ўтказилган тезкор тадбир давомида қўлга олиниб, Тошкент шаҳрига депортация қилинди.
Ушбу шахснинг хатти-ҳаракатларидан жабр кўрган фуқаролардан Ўзбекистоннинг Истанбул шаҳридаги Бош консулхонасига ёки Ўзбекистон Ички ишлар вазирлиги ёхуд ички ишлар органларининг қуйи ҳудудий бўлинмаларига мурожаат қилиш сўралди.
Бош консулхонанинг билдиришича, сўнгги йиллар давомида Ўзбекистонда тергов ва суддан яширинган айрим шахсларнинг Туркия ҳудудида яширинишга уриниши билан боғлиқ кўплаб ҳолатлар кузатилмоқда. Шу билан бирга, Туркия ва Ўзбекистон Ички ишлар вазирликлари ўртасидаги ўзаро ҳуқуқий ёрдам тадбирлари доирасида бу каби шахсларга нисбатан жиноий таъқибни амалга ошириш янада самарали кўринишга эга бўлмоқда.
Жумладан, биргина 2024 йилнинг 10 ойида жавобгарликдан қутулиш мақсадида йиллар давомида қардош давлат ҳудудида яшириниб юрган 37 нафар айбланувчи қўлга олинган. Ноябрь ойида яна қидирувда бўлган яна бир аёл Туркияда ушланиб, Тошкентга депортация қилинди.
Изоҳ (0)