Эрон президенти Иброҳим Раисий 19 май куни ҳалокатга учраган вертолёт тоғга урилганидан кейингина ёниб кетган. Эрон Қуролли кучлари бош штаби авиаҳалокат бўйича дастлабки ҳисоботини эълон қилди.
Ҳисоботга кўра, вертолёт қулашига ташқи таъсир сабаб бўлмаган. Ҳалокатга учраган вертолётнинг учувчиси авиаҳалокатга бир ярим дақиқа қолганда у билан бирга Озарбайжондан қайтаётган иккита вертолёт учувчилари билан боғланган.
Президент вертолёти белгиланган маршрут бўйлаб ҳаракатланган ва четга чиқмаган. Диспетчерлар ва экипаж ўртасидаги суҳбатларда ҳеч қандай шубҳали нарса сезилмаган.
Туман, ҳароратнинг совуқлиги ва қийин рельеф туфайли ҳалокатга учраган вертолётни қидириш ишлари тун бўйи давом этган.
Таъкидланишича, ҳалокат жойини айнан Эрон дрони аниқлаган. Аввалроқ Туркия расмийлари ҳалокат жойи Bayraktar Аkinci дрони томонидан аниқланганини билдирганди. Фалокатга оид баъзи фактлар ҳали тасдиқланмаган, аммо ҳисоботда келтирилганлар ишончли экани маълум қилинди.
Эслатиб ўтамиз, 19 май куни Эрон президенти Иброҳим Раисий авиаҳалокат натижасида вафот этди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди.
Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган. Эрон президентининг дафн маросими 23 май куни Машҳад шаҳрида бўлиб ўтди. Муддатидан олдин президентлик сайловлари 28 июнга белгиланган.
Изоҳ (0)