Украина ҳарбийлари Россия дронларининг ҳужумини қайтариш учун улардан 7 баравар қимматроқ ракеталардан фойдаланмоқда. Бу ҳақда The New York Times газетасида чоп этилган мақолада айтилади.
Мутахассисларнинг фикрича, Россия ишлатаётган Shahed-136 дронлари нисбатан арзон, уларни йўқ қилишда фойдаланиладиган қурол тизими эса анча қиммат.
Украина консалтинг компанияси раҳбари Молфар Артем Старосик дронни уриб тушириш учун ракетадан фойдаланиш дрондан етти баравар қимматга тушишини ҳисоблаб чиқди. Эрон дронларини йиғиш 20 минг долларга тушиши мумкин, Украина томонидан қўлланилаётган «ер-ҳаво» ракеталаридан биттасини учириш нархи эса совет С-300 тизими учун 140 минг доллар, NASAMS учун 500 минг долларгача бўлиши мумкин.
Айрим таҳлилчилар фикрига кўра, вақт ўтиши билан бундай номутаносиблик Россияга фойда келтириши ҳамда Украина ва унинг иттифоқчиларига қимматга тушиши мумкин, деб қайд этди нашр.
Изоҳ (0)