Эрон янада илғор кўп марталик дронларни Россияга яширинча етказиб берди — The Guardian

2022 йилда Эрон яширин равишда Россияга узоқ масофага учувчи жанговар дронлар партиясини топширган деб ёзмоқда The Guardian манбаларига таяниб.

Нашрнинг ёзишича, Москва ва Теҳрон ўртасидаги келишув ноябрь ойида тузилган. Ўшанда Россия делегацияси олтита Mohajer-6, шунингдек, 12 та Shahed 191 ва 129 дронларининг етказиб берилишига келишган. Эрон Россияга илгари берган камикадзе дронлардан фарқли ўлароқ, бу дронлар кўп марта фойдаланиш учун мўлжалланган – зарба берганидан сўнг улар базага қайтиб келади.

Газетанинг аниқлик киритишича, Россия янда илғорроқ учувчисиз учоқларни олишдан манфаатдор, чунки Украина Қуролли кучлари Россия қўллаётган Shahed-131 ва Shahed-136 камикадзе дронларини самарали тарзда уриб туширишни ўрганди.

Нашр манбасининг аниқлик киритишича, дронлар Россияга икки йўналиш бўйича етказилган — уларнинг бир қисми Эрон кемаси орқали жўнатилган, у юкни Каспий денгизидаги Россия ҳарбий-денгиз флоти кемасига ўтказган. Қолганлари Эрон давлат авиакомпанияси томонидан етказилган. Шу билан бирга, Эрон дронлари билан бирга россиялик ҳарбийларга уларни бошқаришни ўргатиш учун 54 нафар инструкторлар жўнатилгани айтилмоқда.

The Guardian нашрининг хабарига кўра, Россияга етказиб берилган учоқлар январь ойи охирида авиазарбага учраган Исфахон заводида ишлаб чиқарилган. Бу келгусида ҳам Россияга дронлар етказиб берилишини шубҳа остига қўяди, чунки зарба оқибатида завод жиддий зарар кўрган бўлиши мумкин, деб ёзмоқда нашр.

Россия урушда Эрон дронларидан фойдаланмоқда

Россия ҳарбийлари Украинадаги ҳарбий ва энергетика объектларига зарба бериш учун Эронда ишлаб чиқарилган Shahed-131/136 камикадзе дронларидан фаол фойдаланмоқда. Уларнинг номи “Геран-1” ва “Геран-2” га ўзгартирилган.

2022 йилнинг кузида The Washington Post газетаси Россия ўз ҳудудида Эрон дронларини ишлаб чиқаришни йўлга қўйишни режалаштираётгани ҳақида хабар берганди. 2023 йил январь ойи бошида Украина Миллий хавфсизлик ва мудофаа кенгаши котиби Алексий Данилов Тольятти шаҳрида дронларни ишлаб чиқариш ташкил этилиши мумкинлигини маълум қилди. Февраль ойида The Wall Street Journal Россия ва Эрон расмийлари Татаристоннинг Елабуга шаҳрида дрон ишлаб чиқарувчи завод қуришни кўриб чиқаётгани ҳақида ёзди.