Хитойнинг CITIC Construction компанияси Ўзбекистоннинг йўл қурилиши соҳасига қизиқиш билдирмоқда. Бу ҳақда Транспорт вазирлиги матбуот хизмати хабар берди.
Маълум қилинишича, 27 март куни вазирликда ушбу компания билан автомобиль йўлларини қуриш ва реконструкция қилиш йўналишидаги лойиҳалар муҳокамасига бағишланган навбатдаги учрашув бўлиб ўтди.
Компания Пунган—Наманган, Тошкент—Чиноз автомобиль йўлларини реконструкция қилиш билан бирга янги пуллик йўлларни қуриш бўйича ўз халқаро тажрибаси билан Ўзбекистоннинг транспорт инфратузилмасини яхшилашда қурилиш соҳасидаги замонавий ечимларни қўллаган ҳолда иштирок этиш хоҳишини билдирди.
Транспорт вазири ўз навбатида ушбу йўллар халқаро стандартларга жавоб берадиган, замонавий технологияларни қўллаган ҳолда қисқа вақтда қурилиши ҳамда қурилиш таннархини арзонлаштиришга алоҳида эътибор қаратилиши лозимлигини таъкидлаб ўтди.
Хориж компанияси лойиҳаларни ўрганиш ишларини олиб бораётгани, яқин кунларда барча талабларга жавоб берадиган лойиҳа таклифларини тақдим этишини маълум қилди.
Ўзбекистондаги илк пулли йўлларнинг қурилиши ҳақида 2018 йилда хабар берилганди. Ўшанда бу каби йўлларнинг биринчисини қуриш билан Германиянинг GP Günter Папенбург компанияси шуғулланиши мумкинлиги айтилганди. 2019 йилда Автомобиль йўллари қўмитаси Ўзбекистондаги илк пулли трассани қуриш учун жой танланаётганини маълум қилганди.
2023 йилда Туркиянинг Cengiz Holding компанияси Ўзбекистонда пулли автомобиль йўлларини қуриш лойиҳаларида иштирок этишга қизиқиш билдирди.
Изоҳ (0)