АҚШнинг Нью Йорк шаҳрида ҳайдовчилар тиғиз соатларда марказий йўллардан ҳаракатланиш учун пул тўлайди. Бу ҳақда Financial Times хабар берди.
Маълум қилинишича, дастур 5 январь куни ишга туширилган. “Тирбандлик учун тўлов” аҳоли зич яшайдиган шаҳарда транспорт тирбандликларини камайтиришга қаратилган. Иш кунлари Манҳеттеннинг энг гавжум ҳудудларига кириш нархи 9 долларгача баҳоланиши мумкин. Иш вақтидан ташқари кўпчилик транспорт воситалари учун йўллардан фойдаланиш нархи 2,25 долларни ташкил этади.
Кичик юк машиналари ҳайдовчилари тиғиз вақтда 14,40 доллар, каттароқ юк машиналар эса 21,60 доллар тўлайди. Ушбу тизим шаҳар марказига кирадиган автомобиллар сонини тахминан 10 фоизга камайтириши, Нью Йоркда жамоат транспортини ривожлантириш учун 15 миллиард доллар йиғишга ёрдам бериши кутилмоқда.
Шаҳар транспорт бошқармаси раиси ва бош директори Янно Либернинг айтишича, режа беш йил давомида ишлаб чиқилган. Нью Жерси штати адвокатлари йўл ҳақи тарифини жорий этилишининг олдини олиш мақсадида судга тақиқ учун ариза топширган, бироқ муҳокамадан сўнг судья уни рад этган.
Жорий этилган йўл ҳақи тўлови тизимининг истиқболи ноаниқ бўлиб қолмоқда. Республикачилар сайланган президент Дональд Трампни дастурга берилган федерал рухсатномани бекор қилишга даъват этмоқда.
Изоҳ (0)