“Ўзбекистон темир йўллари”нинг собиқ раиси компания бош муҳандиси этиб тайинланди 

Ўзбекистон ҳукуматнинг тегишли қарорига мувофиқ “Ўзбекистон темир йўллари” тизимида қатор тайинловлар амалга оширилди. Хусусан:

Зуфар Нарзуллаев – “Ўзбекистон темир йўллари” АЖ бошқарув раиси лавозимига;

Ҳикматулла Раҳметов – “Ўзбекистон темир йўллари” АЖ бошқаруви раисининг трансформация, рақамлаштириш ва молия бўйича биринчи ўринбосари лавозимига;

Ҳуснутдин Ҳосилов – “Ўзбекистон темир йўллари” АЖ бош муҳандиси лавозимига;

Абдумалик Камилжонов – “Ўзбекистон темир йўллари” АЖ бошқаруви раисининг ташишлар ва логистика бўйича ўринбосари лавозимига;

Элёр Ризаев – “Ўзбекистон темир йўллари” АЖ бошқаруви раисининг темирйўл объектларини таъмирлаш ва қуриш бўйича ўринбосари лавозимларига тасдиқланди.

Июль ойида президент раислигида ўтказилган видеоселектр йиғилишида “Ўзбекистон темир йўллари” АЖ раиси Ҳусниддин Ҳосилов лавозимидан озод этилганди. Йиғилишда бундан тўрт йил аввал Тошкент—Самарқанд, Тошкент—Андижон пулли йўллари ва “Тахтақорача” довонида пулли туннел қуриш топшириқлари берилгани, бироқ на лойиҳа қилиш, на инвестор жалб қилиш бўйича ҳалигача амалий ишлар бошланмагани танқид остига олинган эди.

Шунингдек, “Ўзбекистон темир йўллари” акциядорлик жамияти ягона акциядори қарорига мувофиқ, қуйидаги раҳбарларни лавозимларга тайинланди:

• Сирожиддин Норқобилов – “Темирйўлинфратузилма” акциядорлик жамияти бош директори 2023 йил 13 декабрь кунидан;
• Абдусамат Мўминов – “Темирйўлкарго” акциядорлик жамияти бош директори 2023 йил 13 декабрь кунидан;
• Дилшоджон Хожиакбаров – “Темирйўлекспресс” акциядорлик жамияти бош директори 2023 йил 13 декабрь кунидан;
• Мухсинжон Мусажонович – “Темирйўл ижтимоий хизматлар” муассасаси директори 2023 йил 13 декабрь кунидан;
• Азизжон Холматов – “Ўзтемирйўлйўловчи” акциядорлик жамияти “Темир йўл вокзаллари” МЧЖ директори 2023 йил 13 декабрь кунидан;
• Муратжон Мамараимов – “Ўзтемирйўлйўловчи” акциядорлик жамияти “Шаҳар атрофида йўловчи ташиш” МЧЖ директори 2023 йил 13 декабрь кунидан.

Эслатиб ўтамиз, сентябрь охирларида президент Шавкат Мирзиёев ҳузурида темирйўл соҳасида ҳал қилиниши лозим бўлган асосий масалалар юзасидан йиғилиш ўтказилганди. Ўшанда “Ўзбекистон темир йўллари” холдингга айлантирилиши, шунингдек, “Ўзбекистон темир йўллари”нинг носоҳавий активларини сотиш вазифаси қўйилгани тўғрисида хабар берилганди.