Аёвсиз ўққа тутилган Украина шаҳарларидаги вайронагарчилик ва қурбонлар. Урушнинг 229-кунидан фоторепортаж
10 октябрь куни эрталаб Украина бўйлаб Киевдан Одессагача бўлган шаҳарлар кенг кўламда ўққа тутилди. Украина расмийлари 14 киши ҳалок бўлгани ва 100 га яқин одам яраланганини маълум қилди. Владимир Путин бу ҳужум «Киев режимининг жиноятларига» жавоб эканини айтди ва Россия ҳудудида «терактлар давом этса» бундан ҳам «қаттиқроқ» жавоб беришни ваъда қилди.
Украина Россия Федерацияси Хавфсизлик кенгаши аъзоларини, жумладан Дмитрий Медведев, Сергей Шойгу ва Валентина Матвиэнкони қидирувга берди. Россия Тергов қўмитаси раҳбари Александр Бастрикин Медведевнинг «ноқонуний жиноий жавобгарликка тортилгани» сабабли жиноий иш очишга кўрсатма берди. Александр Лукашенко Россия ва Беларусь қўшинларининг «минтақавий гуруҳлангани» ҳақида эълон қилди: бунинг сабаби ва қўшинлар айнан қаерда эканига изоҳ бермади. Meduza урушнинг 229-кунига оид асосий фотосуратларни тақдим этди.
Куннинг асосий воқеаси: Украина бўйлаб ракета зарбалари
Россия ҳарбий кемаси Украинадаги нишонга қанотли ракета билан зарба йўлламоқда. Украина Қуролли кучлари Бош штаби маълумотларига кўра, Россия қўшинлари Украина шаҳарларига 80 дан ортиқ ракета отган, уларнинг ярми ҳаво ҳужумидан мудофаа тизимлари томонидан уриб туширилган.Фото: Россия Мудофаа вазирлиги матбуот хизмати
Киевлик йигит шаҳар марказидаги кўчада ёнаётган машина ёнидан югуриб ўтмоқда. Украина пойтахтида Россия ҳужумидан зарар кўрган объектлар орасида Германия элчихонасининг виза бўлими жойлашган «101 Tower» бизнес маркази биноси, марказий темир йўл вокзали ҳудуди ва Тарас Шевченко парки бор — паркдаги болалар майдончаси яқинига снаряд тушган.Фото: Reuters
Киевдаги бинолардан бирининг фасадида синган деразалар. Россия Мудофаа вазирлигининг таъкидлашича, Россия қўшинлари «ҳарбий қўмондонлик, алоқа ва энергетика объектларига» зарба берган.Фото: Scanpix
Россиянинг Киевга йирик ҳужуми оқибатида ҳалок бўлган тинч аҳоли вакилининг жасади. Киев мерияси маълумотларига кўра, Украина пойтахтида жами беш киши ҳалок бўлган, 50 дан ортиқ киши жароҳатланган.Фото: Reuters
Жароҳат олган киевликлар.Фото: Reuters
Қутқарувчи ярадор киевлик аёлнинг икки итини кўтариб кетмоқда.Фото: EPA
Муниципалитет ишчилари Киев марказида Россия ҳужумидан зарар кўрган болалар майдончасини тозаламоқда.Фото: SOPA Images
Ракета келиб урилган «101 Tower» бизнес марказининг кўриниши. Унда Германия элчихонасининг виза бўлими (у бир неча ойдан бери ёпилган, шунинг учун ҳеч ким жабрланмаган) ва Samsung офиси жойлашган.Фото: Getty Images
Запорожьеда ўт ўчирувчилар бино вайроналари остидан ҳалок бўлган фуқаронинг жасадини олиб чиқмоқда. Маҳаллий ҳокимият маълумотларига кўра, 9—10 октябрь кунлари Россиянинг ракета зарбалари оқибатида шаҳарда 16 нафар тинч аҳоли вакили ҳалок бўлган, юзга яқин киши жароҳатланган. Сўнгги бир ҳафта ичида рус қўшинлари Запорожьени тўрт марта ўққа тутди.Фото: Reuters
Славянск аҳолиси вакили хусусий уйдаги вайроналарни кўздан кечирмоқда. Маҳаллий ҳокимият маълумотларига кўра, шаҳарда Россиянинг ҳужуми оқибатида тўрт киши ҳалок бўлган.Фото: AP Photo
Днепр шаҳрида ракеталардан бири йўлга тушиб портлади, автобус шикастланди. Россия қўшинларининг Днепропетровск вилоятига уюштирган йирик ҳужуми оқибатида камида тўрт киши ҳалок бўлди, 19 киши яраланди.Фото: AFP
Днепрда ҳалок бўлган аҳолининг жасадлари.Фото: AP Photo
Ўққа тутишлар оқибатида Львовда электр энергияси ўчган. Кечқурун маҳаллий ҳокимият вилоятдаги электр таъминотининг 90 фоизини, шаҳарнинг ўзида эса 95 фоизини тиклашга муваффақ бўлганини маълум қилди.Фото: Reuters
Донбасс шимолидаги Украина қўшинлари
Харьков ва Донецк вилоятлари чегарасидаги Долина қишлоғи яқинида ташлаб кетилган рус танки устида Украина байроғи. Бу аҳоли пункти атрофида бир неча ой давомида шиддатли жанглар олиб борилди. 10 сентябрда рус армияси бу ердан чекинди.Фото: AFP
Украина ҳарбийлари Донецк вилоятидаги фронт чизиғида 2С1 «Гвоздика» гаубицасидан ўт очишга тайёрланмоқда.Фото: AFP
Харьковдан Изюмга кетаётган поэздда ота ва унинг қизи. Уруш бошланганидан етти ой ўтгач, минтақа ҳукумати темир йўл қатновини тиклашга қарор қилди. Изюм 10 сентябрь куни Россия кучларидан озод қилинган.Фото: AFP
Изоҳ (0)