Россия 2026 йилгача Украинанинг тўртта вилоятини босиб олишни ва кейин Европа сари қадам ташлашни режалаштирмоқда. Бу ҳақда Welt хабар берди.
Хабарга кўра, Донецк, Луганск, Херсон ва Запорожье вилоятларини тўлиқ босиб олиш мақсад қилинган.
АҚШнинг сайланган президенти Дональд Трамп Москвани ҳозир тўхташга мажбур қилса ҳам, Россия яқин йилларда Европа учун катта хавф туғдириши мумкин, дейилади хабарда.
Германия Мудофаа вазирлиги ҳузуридаги Украина вазият маркази раҳбари генерал майор Кристиан Фройдга кўра, Россия Украинадаги қўшинларига эҳтиёжига нисбатан ортиқча қуролланмоқда. Россия армиясида танклар, ўқ-дорилар, ракеталар ва дронлар сони кўпаймоқда.
Бу Кремлнинг НАТО билан урушга тайёргарлик кўриш ниятидан далолат беради, гарчи ҳозирда Россия Ғарб билан тўғридан-тўғри тўқнашувни режалаштирмаётган бўлса-да, дейди Фрод.
Немис ҳарбийлари маълумотларига кўра, Россия армияси Украинадаги инсон ва моддий йўқотишларни сезиларли даражада қопламоқда. Москва ҳар ойда 30 мингга яқин аскар ёллаётгани ва янги ёлланганларни юқори моддий рағбатлантириш орқали ўзига жалб қилаётгани айтилмоқда.
Бундан ташқари, Россия авиабомбалар, жумладан бошқариладиган ракеталар, артиллерия снарадлари, шунингдек, турли хил камикадзе дронларини кенг миқёсда ишлаб чиқаришни йўлга қўйган. Жумладан, йилига минглаб “Shahed” дронларини ишлаб чиқармоқда.
Россия сезиларли миқдордаги қўшинларга ва кенг кўламли қудратли техникага эга, дейди Европа парламенти Хавфсизлик ва мудофаа масалалари қўмитаси раиси Мари Агнес Штрак-Симмерманн.
Унинг сўзларига кўра, Украинадаги уруш Россиянинг заиф томонларини, хусусан, моддий-техник таъминот, эскирган қурол-аслаҳалар ва аскарларнинг паст руҳий ҳолатини ҳам ошкор қилди.
Ҳарбий таҳлилчи Нико Ланге потенциал хавфни баҳолашда фақат аскарлар ёки танклар сонига эътибор бермасликка чақирди.
Россия қўпол ҳарбий куч ишлатишга интилади ва катта йўқотишларга тайёрдир. Бу Россияни ниҳоятда хавфли қилади, дейди Ланге.
У Россиянинг Польша ва Болтиқбўйи мамлакатларига қарши тўғридан-тўғри ҳамда гибрид ҳужумлари эҳтимоли ҳақида огоҳлантиради. Штрак-Симмерман бундай сценарийларнинг эҳтимоллиги кўп жиҳатдан Украинадаги уруш натижаларига боғлиқлигини айтди.
“Путин айтиш мумкинки, қон таъмини тотиб кўрди. Агар сиз тинчликни сақламоқчи бўлсангиз, ўзингизни ҳимоя қила олишингиз керак. Агар биз буни тушуниб етмасак ва Путин Украинада муваффақиятга эришса, тўрт-беш йилдан сўнг НАТО аъзосига ҳужум қилиш эҳтимоли ҳақиқатга жуда яқин бўлади”, деди у.
Изоҳ (0)