Украинадаги энергетика объектларига зарбалар «қисман» Севастополдаги терактга жавоб ҳисобланади. Бу ҳақда Россия президенти Владимир Путин Арманистон ва Озарбайжон етакчиалри билан музокаралардан кейин ташкил этилган матбуот анжуманида маълум қилди.
«Қисман шундай. Аммо бу биз қилишимиз мумкин бўлган нарсаларнинг ҳаммаси эмас», — деди Путин 31 октябрь куни Украина ҳудудидаги объектларга зарбаларни Украина қуролли кучларининг Севастополдаги ҳужумларига жавоб деб ҳисоблаш мумкинми? — деган саволга жавобан.
29 октябрга ўтар кечаси Украина қуролли кучлари ҳаво ва денгиз дронлари Севастополь кўрфазида Қора денгиз флоти ва фуқаролик кемаларига ҳужум қилди. Шаҳар губернатори Михаил Развожаев дронларнинг барчаси йўқ қилинганини, фуқаролик инфратузилмасига зарар етмаганини ва жабрланганлар йўқлигини билдирди. Шу билан бирга, Россия Мудофаа вазирлиги «Иван Голубец» кемаси зарар кўрганини маълум қилди.
Шунингдек, муассасага кўра, дронлар ҳужумига учраган кемалар «дон битими» доирасида денгиз йўлаги хавфсизлигини таъминлашда иштирок этган. Шундан кейин Россия ушбу битимдаги иштирокини тўхтатишга қарор қилди.
31 октябрь куни Россия Мудофаа вазирлиги Украинадаги ҳарбий ва энергетика объектларига зарбалар ҳақида ҳисобот берди. Шу куни Киев, Харьков ва Украина томонидан назорат қилинувчи Запорожье шаҳрида портлашлар юз берди, оқибатда пойтахтнинг бир қисмида электр ва сув таъминотлари узилиб қолди. Черкасси ва Кировоград вилоятларида ҳам энергетика объектларига зарар етди. Харьковда метро ҳаракати тўхтатилди.
Изоҳ (0)