“Украина кўмир ва газ электр станцияларининг 80 фоизи Россия ҳужумига учраган” — Украина энергетика вазири

Украина энергетика вазири Герман Галушченко Россия Украинадаги анъанавий электр станцияларининг 80 фоизига ҳужумлар уюштирганини маълум қилди. Бу ҳақда The Moscow Times нашри хабар берди.

Манбада айтилишича, анъанавий типдаги электр станцияларининг қарийб тўртдан уч қисми, гидроэлектр станцияларининг ярмидан ортиғи Россия томонидан нишонга олинган. Оқибатда эса Украинанинг қатор ҳудудларида тизимли равишда электр узилишлари кузатилмоқда.

Москва март ойи охиридан бери Украина электр тармоқларига деярли ҳар куни зарбалар бериб, мамлакат шимоли-шарқидаги Харьков шаҳрида катта электр ўчирилишларига сабаб бўлмоқда. Тезкор бригадалар ҳужум оқибатларини бартараф этиш учун ҳудудда туну кун ишламоқда.

“ИЭС ишлаб чиқариши 80 фоизгача ҳужумга учраган. ГЭСларнинг ярмидан кўпи авария ҳолатида. Бу Украинанинг энергетика секторига уруш бошланганидан бери қилинган энг йирик ҳужумдир”, — деган Герман Галушченко.

Украинада ИЭСлар мамлакатнинг электрга бўлган эҳтиёжининг асосий қисмини таъминлаб беради. Нисбатан пастроқ ҳисса эса ГЭСлар улушига тўғри келади. Запорожьеда жойлашган мамлакатдаги энг йирик атом электр станцияси эса уруш бошланганидан бери Россия назорати остида қолмоқда.

Галушченконинг таъкидлашича, энергия тузилмасига сўнгги ҳужумларнинг кўлами ва таъсири 2023 йилнинг қишида миллионлаб одамларни электр ва иситиш воситаларисиз қолдирган ҳужумларга қараганда анча каттароқ.