Жаҳон соғлиқни сақлаш ташкилоти (ЖССТ) 2022 йил февралда Россиянинг кенг кўламли босқини бошланганидан кейин Украинада соғлиқни сақлаш тизимига 1 004 та ҳужум уюштирилганини қайд этди. Бу гуманитар фавқулодда вазиятда ташкилот томонидан кузатилган энг юқори кўрсаткич.
ЖССТ таъкидлашича, кенг кўламли босқин бошланганидан бери 15 ой ичида ташкилот тасдиқлаган 1 004 та ҳужумда 101 киши, жумладан, тиббиёт ходимлари ва беморлар ҳалок бўлган, кўплаб одамлар жароҳатланган.
Ташкилот маълумотларига кўра, ҳужумлар пайтида 896 та касалхона зарар кўрган, 273 та ҳужум таъминотга, 121 та ҳужум транспортга, 72 та ҳужум ходимларга ва 27 та ҳужум беморларга зарар етказган.
Шунингдек, тиббий хизмат кўрсатувчи провайдерлар, таъминот занжирлари, жиҳозлар ва транспорт, шу жумладан тез ёрдам машиналари ҳам нишонга олинган.
Энг кўп зарар кўрган ҳудудлардаги, жумладан Херсон, Харьков, Запорожье ва Донецк вилоятларидаги соғлиқни сақлаш муассасалари киради. Шу билан бирга, ушбу ҳудудлардаги тиббиёт муассасаларининг юқори фоизи, зарар кўрганига қарамай, ўз фаолиятини давом эттирмоқда.
ЖССТ маълумотларига кўра, ходимлар ва тиббий асбоб-ускуналар етишмаслиги туфайли кимётерапия ва маммография каби ихтисослаштирилган хизматларни кўрсатишда жиддий муаммолар бор. Баъзи ҳудудларда юқори малакали акушерлик ёрдамини кўрсатишда қийинчиликлар мавжуд.
“Урушдан вайрон бўлган ҳудудларда бирламчи тиббий-санитария ёрдами кенг қўлланишига қарамай, сўнгги олти ой ичида соғлиқни сақлаш харажатлари ошди. ЖССТ томонидан ўтказилган сўровлар шуни кўрсатдики, аҳолининг деярли учдан бир қисми маълум тиббий хизматларни сотиб олишда қийналмоқда”, — деди ташкилот.
ЖССТ шунингдек, 2022 йил 24 февралдан бери ташкилот бутун Украина бўйлаб деярли 9 миллион кишига ёрдам кўрсатганини маълум қилди.
Изоҳ (0)