Украина Мудофаа вазирлиги разведка бошқармаси бошлиғи Кирилл Буданов Украинадаги уруш 2021 йилда бошланиши керак бўлганини айтди. Буданов Voice of America’га берган интервьюсида бу ҳақда гапирди.
Маълум қилинишича, 2021 йилда Путин халқаро дипломатик саъй-ҳаракатлар билан тўхтатиб қолинган. Босқиннинг бошланиш санаси 2022 йил февралига кўчирилган ва якуний қарор 23 февраль куни Кремлда қабул қилинган.
“Уруш бошланганига бир йилдан ўтди ва Россия ўзининг стратегик вазифаларидан ҳеч бирини бажара олмади. Бироқ, Украина 2022 йил февраль яқинлашганда, маълум қадамлар қўйди ва айнан шу сабабли Россия 24 февралда ўз режасини амалга ошира олмади. Мисол тариқасида, 23- февраль куни бизнинг авиациямиз шай ҳолатда эди. Россия 24 февраль куни ракеталар учирганида, бизнинг жанговар авиациямиздаги йўқотишлар деярли минимал, нолга тенг бўлди. Бундай кичик қадамларнинг кўпи сўнгги дақиқаларда амалга оширилган”, — деди Буданов.
Украина разведка раҳбарининг фикрича, Россия узоқ давом этадиган ҳарбий ҳаракатларга тайёр эмас.
“Мен сизга разведка раҳбари сифатида шу гапни айтяпман. Улар ўн йиллик урушга тайёр эканини ҳар томонлама кўрсатади, аслида уларнинг ресурслари жуда чекланган. Ҳам вақт, ҳам ҳажм жиҳатидан. Россияда буни жуда яхши билишади”, — деди у.
Разведка раҳбарининг фикрича, Хитой Россияга қурол-яроғ берилишига рози бўлмайди. Айни пайтда у бундай мавзулар муҳокама қилинаётганига ҳеч қандай далил кўрмаётганини таъкидлади.
Изоҳ (0)